11/17/2009 12:22:12 PM

'Mediakriza sociale', libër i ri nga Isidor Koti

Kriza e medias shqiptare në optikën e gazetarit dhe studiuesit Isidor Koti.

Nga Doriana Metollari
drejtor@hermesnews.org
17 Nëntor 2009

TIRANË - Isidor Koti vjen para lexuesit me një libër të ri në fushën e gazetarisë. “Mediakriza sociale” bën pjesë tashmë në lëmin e studimeve të gazetarisë shqiptare, që edhe pse të pakta në numër po pasurohen nga autorë të rinj dhe me perspektivë.

Periudha prej pesë vjetësh në rolin e pedagogut dhe gazetarit aktiv i ka mjaftuar për të sjellë në jetë librin e dytë autorit të ri, i cili ende nuk i ka mbushur 27 vjeç.

Pas librit “Hirushja është zgjuar” kushtuar radios, këtë herë Isidori vjen me një studim që synon të pasqyrojë gjerësisht rolin që media lipset të luajë në mbrojtjen, respektimin e promovimin e të drejtave të të dhunuarve në shoqëri, veçanërisht fëmijëve.

“Media në përgjithësi dhe ajo e shkruar në veçanti mund të luajë një rol të rëndësishëm për mbrojtjen dhe promovimin e të drejtave. Një raportim korrekt dhe profesional ndihmon në njohjen dhe kuptimin e kësaj situate për publikun e gjerë, evidentimin e problemeve si dhe adresimin e tyre nga politikëbërësit dhe shoqëria,” - thekson autori në studim.

Libri prej 170 faqe përmban pesë kapituj dhe përfshin periudhën studimore të dy viteve të fundit. Në tekst nënvizohet se përgjatë viteve demokratike paskomuniste në Shqipëri, mediat në përgjithësi, dhe sidomos revistat e gazetat, fituan të gjithë hapësirat e nevojshme politike, sociale e profesionale për të trajtuar pa kufizime gjithë gamën e problemeve që shqetësojnë shoqërinë shqiptare.

Në këtë kuadër, vend të veçantë zë edhe problematika e pasqyrimit të dhunës dhe veçanërisht e dhunës së ushtruar ndaj fëmijëve. Jo pak probleme janë vërejtur te gazetarët sidomos në ndikimet psikologjike dhe etikën profesionale.

Këto janë arsyet kryesore pse autori Isidor Koti e kthen në objekt studimi këtë çështje mjaft komplekse e pasqyrimit të dhunës ndaj fëmijëve në shtypin shqiptar.

Me qëllim që studimi të ishte sa më analitik dhe i thelluar, autori është përqëndruar në gazetat që kanë më shumë ndikim në opinionin e shqiptarëve dhe të botuara përgjatë dy viteve të fundit.

Gazetari dhe studiuesi Isidor Koti ka analizuar me vëmendje edhe aktet ligjore e nënligjore kryesore të miratura nga strukturat përkatëse ndërkombëtare dhe të miratuara nga strukturat përkatëse ndërkombëtare dhe të miratuara nga Kuvendi i Shqipërisë që kanë të bëjnë me parandalimin e dhunës që ushtrohet ndaj tyre, me pasqyrimin e dhunës ndaj fëmijëve në media të ndryshme etj, duke argumentuar se në pasqyrimin e dhunës së ushtruar ndaj fëmijëve në shtypin shqiptar nuk respektohen sa dhe si duhet aktet ligjore e nënligjore përkatëse.

Në libër theksohet se shpesh, për qëllime komerciale, gazetat i pasqyrojnë skenat e dhunës në vendet më të dukshme në gazetë, të cilat ndikojnë negativisht në shoqërizimin jo vetëm të fëmijëve dhe të të rinjve, por edhe të prindërve të tyre.

Në këtë studim arsyetohet se në pasqyrimin e dhunës së ushtruar ndaj fëmijëve, gazetarët, në mjaft raste, dhunojnë kriteret e etikës së gazetarit.

Analizat e argumentuara sociologjike autori i ka shoqëruar edhe me sugjerime profesionale për përmirësimin e mënyrave të paraqitjes së dhunës ndaj fëmijëve nëpër faqet e gazetave. “Sugjerime të tilla burojnë natyrshëm nga logjika e parashtrimit profesional të çështjeve dhe janë larg moralizmave të thata, të cilat përgjithësisht bëjnë efekt të kundërt” – thekson recensuesi i librit Prof. Zyhdi Dervishi.


Kush është Isidor Koti?

Lindi në Gjirokastër, në 16 dhjetor 1982. Pas përfundimit të liceut në qytetin e lindjes, vazhdoi studimet universitare për Gazetari në Universitetin e Tiranës në vitet 2001-2005 dhe më pas vijoi specializimin në vitet 2006 – 2008, për Filozofi dhe Sociologji. Që prej tetorit të vitit 2005 e në vazhdim, ai është pedagog në Universitetin “A. Xhuvani”, Elbasan, në lëndën Gazetari Radio, Marrëdhënie me Publikun dhe Etika e Medias si dhe lektor në Universitetin e Tiranën në lëndët e komunikimit. Autor i shkrimeve e kumtesave studimore brenda dhe jashtë vendit dhe trajnues e organizator e moderator i konferencave për median. Ai është specializuar disa shtete si Gjermani, Zvicër, Hungari, Serbi, Armeni, etj., dhe ka marrë diplomë specializimi nga Akademia e Radios “DW” në Bonn-Gjermani.



Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 646 here