11/16/2009 1:05:48 PM

Raund i ri bisedimesh greko-maqedonase

Te tjera bisedime mes dy vendeve per emrin

info@hermesnews.org
16 Nentor 2009

ATHINE- Ndërsa në Nju Jork rifillojnë negociatat për mosmarrëveshjen midis Greqisë dhe Maqedonisë lkidhur me çështjen e emrit të kësaj të fundit, i dërguari i sekretarit të përgjithshëm të OKB-së, Methju Nimic po shqyrton mundësinë e zhvillimit të një takimi tripalësh, midis tij dhe dy negociatorëve respektivë.

Pala greke e konsideron të pamundur arritjen e zgjidhjes brenda ditëve të para të muajit të ardhshëm, ndërsa një ekspert i politikës së jashtme ka thënë se zgjidhja mund të gjendet. Vetëm me ndërhyrjen energjike të Bashkimit Europian dhe Shteteve të Bashkuara.

Dy takimet që zhvilloi zoti Methju Nimic në Nju Jork me negociatorin grek dhe atë maqedonas, inkuadrohen në përpjekjet e të dërguarit të posaçëm të OKB-së për të zhvilluar një takim të përbashkët tripalësh. Raundi i ri bisedimeve fillon sot me formulën e zakonshme, por zoti Nimic synon që të ulet në të njëjtën tryezë, me dy negociatorët përkatës, Vasilakis dhe Jolevski.

Këtë i ka deklaruar shtypit grek negociatori Vasilakis, duke theksuar se zoti Nimic do të vendosë në varësi të rrethanave dhe vlerësimeve të tij për mbajtjen e takimit tripalësh. Vasilakis, i ka përcjellë të dërguarit të OKB-së, zotit Nimic, vendimin e qeverisë greke se nuk mund t’i jepet Maqedonisë datë për fillimin e negociatave anëtarësuese në BE, nëse nuk është zgjidhur më parë çështja e emrit.

Ai nuk pranoi të komentonte njoftimet sipas të cilave Uashingtoni i ka përcjellë Athinës dhe atij vetë gatishmërinë e Shkupit për kompromis. I pyetur nga agjencia shtetërore e lajmeve, ANA, Vasilakis i cilësoi si qesharake dhe të padenja për t’u komentuar njoftimet e mediave maqedonase se i paraqiti zotit Nimic propozime konkrete dhe lëshimet që Athina është e predispozuar të bëjë.

Në prag të rifillimit të negociatave në selinë e OKB-së në Nju Jork, ekspertët gjykojnë se zgjidhja në çështjen e emrit është e pamundur të zgjidhet nëpërmjet negociatave të Athinës e Shkupit nën kujdesin e Kombeve të Bashkuara.

Jens Bastian është ekspert i çështjeve ballkanike në Fondacionin Grek të Politikës së Jashtme. "Zgjidhja nuk mund të gjendet vetëm nëpërmjet Athinës e Shkupit, ajo mund të gjendet vetëm me mbështetjen dhe ndërhyjen e Bashkimit Europian dhe të Shteteve të Bashkuara. Nevojitet një lëvizje një ndërhyrje politike nga zonja Klinton dhe zyrtarë të tjerë amerikanë".

Nëse beson se këto lëvizje do të sillnin rezultat, përkundër negociatave të pafrytshme negociatat që po zhvillohen prej dy dekadash në kombet e bashkuara, eksperti Jens Bastian vëren: "Nuk e di nëse rezultati do të vijë më lehtë, po për mua është e rëndësishme që të dalim nga logjika që zgjidhja mund të gjendet vetë nëse bien dakord Athina dhe Shkupi. Do të jenë negociata të komplikuara dhe që do të kërkojnë një tryezë më të madhe, me pjesëmarrjen e BE, SHBA dhe, sigurisht OKB".

Jens Bastian i përgjigjet edhe pyetjes se a ka shenja se mund të ndodhë diçka e tillë? "Po vlerësimi i fundit i KE për Maqedoninë e bënte të qartë se mund t’i fillojë negociatat e anëtrësimit, por duhet të gjejë një zgjidhje për çështjen e emrit dhe jo vetëm kaq, por të ketë marëdhënie të hapura e të fqinjësisë së mirë me Greqinë. Pra, ky është një mesazh që, BE është i gatshëm, por ju duhet të bëni punën tuaj. Këtë kam parasysh kur them se nuk është çështja vetëm te Greqia, çështja është se çfarë do të bëjnë autoritetet e Shkupit.

Në këtë drejtim mendoj se është një hap domethënës ftesa që presidenti maqedonas Ivanov i dërgoi zotit Papulias për të vizituar Shkupin, gjë që deri tani nuk ka ndodhur kurrë më parë. Për mua këto janë hapat që duhet të bëhen në të ardhmen dhe kur them të ardhme kam parasysh muajt e ardhshëm dhe jo vitet e ardhshëm"- tha analisti Jens Bastian.

Udhëheqja aktuale greke është tepër e interesuar që t’i jepej fund sa më shpejt mosmarrëveshjes me Maqedoninë, por vlerëson se kjo është e pamundur të bëhet deri në samitin e dhjetorit.

Në këtë kuadër, burime diplomatike vendase, të cituara nga shtypi grek, e konsiderojnë si të ekzagjeruar dëshirën e Uashingtonit që kjo çështje të mbyllet deri më 7 dhjetor. Por theksojnë se implikimi amerikan do të mund të përshpejtonte procesin e zgjidhjes.

HermesNews © 2009

Dërgo me email | Stampo artikullin | Artikulli është lexuar 443 here