10/30/2009 5:52:05 PM

Shpërfillja ndaj mjedisit!

Përmasat që merr ky lajm bëhen edhe më serioze kur mëson se nëse nuk do të ndërhyhet për largimin dhe pakësimin e ndotjes në ambientet publike, sipas stafeve shëndetësore, brenda një kohe të shkurtër situata mund të bëhet e rënduar dhe të rrezikojnë jetën edhe më shumë njerëz.

Nga Isidor Koti
30 Tetor 2009

TIRANE - Gjatë shfletimit të shtypit të ditës, në një cep të një të përditshmeje lexova një artikull që bënte me dije se në Tiranë, çdo qytetari i shkurtohet jeta dy vjet si rezultat i ndotjes së ajrit.

Nuk ishte thjesht një lajm i bujshëm dhe fare i panjohur që vinte nga një institucion i rëndësishëm si Instituti i Shëndetit Publik. E megjithatë është një kambanë alarmi që bie prej vitesh dhe nuk është ndryshuar gjendja, ndonëse mësohet se humbasin jetën dhjetëra e qindra qytetarë të pafajshëm.

Ne e pranojmë se jetojmë në "ferrin" e pisllëkut dhe të
rrezikut që na kanoset nga ambjenti i tejmbushur me pluhur, gazra e papastërti të gjithëfarëllojshme dhe harrojmë “të protestojmë” ndaj neglizhencës së pushtetit qëndror apo lokal, tek i cili paguajmë taksat për mirëmbajtjen e ambjentit, gjelbërimin, ndriçimin etj.

Përmasat që merr ky lajm bëhen edhe më serioze kur mëson se nëse nuk do të ndërhyhet për largimin dhe pakësimin e ndotjes në ambientet publike, sipas stafeve shëndetësore, brenda një kohe të shkurtër situata mund të bëhet e rënduar dhe të rrezikojnë jetën edhe më shumë njerëz.

Le të kujtojmë se një nga efektet negative që krijon ky lajm na çon te sëmundja e kancerit që në vendin tonë po përhapet në masë të konsiderueshme, si pasojë e grimcave kancerogjene që krijohen në ajrin që ne thithim pranë ambienteve të ndotura.



Nëse po e dëgjon,
do të thotë se funksionon!


Ky është një ndër faktorët pse në Shqipëri kemi një vdekshmëri të lartë nga
kanceri në mushkëri. Nuk janë pak, por rreth 200 të prekur çdo vit të prekur nga kjo sëmundje e pashërueshme. Le të depërtojmë më në thellësi, duke vlerësuar edhe faktin se nga kontrollet e ushtruara prej specialistëve të mjedisit është vënë re përdorimi në masë i një elementi tepër të rrezikshëm në produktet shqiptare: eterniti, ose çimento me 15-30 për qind përmbajtje amianti, që është materiali më i përdorur në mbulesat e çative të shtëpive, ndërtimin e tubave të shkarkimit të ujërave të shiut, mjedise publike si: shkolla, konvikte, kopshte dhe objektet e vjetra elektroshtëpiake të prodhuara kryesisht në vendet e Lindjes.

Mësohet gjithashtu se faktorë të ndryshëm si: ndërtimet, makinat, gomat e djegura apo fabrikat e amortizuara shkaktojnë një ndotje tepër të rrezikshme, ndaj mendova të bëja një llogari të thjeshtë bazuar në informacione zyrtare.

Sigurisht, pa dashur kurrësesi, t’i drejtoj gishtin personave përgjegjës, sepse edhe ata thithin të njëjtin ajër në Tiranë, si unë dhe qytetarët e thjesht që jetojnë më metropol. Ja cilat janë llogaritë: 200 vdekje shkaktohen çdo vit në vendin tonë nga ndotja e ajrit, sipas të dhënave të OBSH-së, 1400 raste të reja me kancer mendohet të zbulohen çdo vit në vendin tonë nga ambienti i ndotur, 2.5 herë më i lartë se normat e BE-së është ndotja e ajrit në Tiranë, 2 herë më i lartë se normat e BE-së është ndotja e ajrit në Tiranë, sipas monitorimit të fundit të ISHP-së.

Në konkluzion të shifrave, rezulton se ndotja e ajrit është mbi normat
e lejuara të BE-së, ku ne po përpiqemi të anëtarësohemi me çdo kusht. Këto të dhëna duhet të konsiderohen mjaft alarmante dhe nevojitet menjëherë të ndërhyhet për përmirësimin e situatës.

Por le të mos harrojmë edhe disa fakte të rëndësishme të situatës në kryeqytet. Konstatohet me sy të lirë se puna e firmave të pastrimit në Tiranë është në nivele shumë të ulëta, gjë që shkakton një ndotje të madhe. Firmat e pastrimit nuk respektojnë në mënyrën e duhur rregullat, duke mos i larë rrugët e qytetit për muaj të tërë dhe kjo sjell praninë e një sasie të madhe të grimcave të pluhurit.

Kjo sasi pluhuri në ajër i dëmton shumë qytetarët e Tiranës dhe sipas specialistëve, kjo gjë i merr atyre rreth 1.5-2 vjet jetë. Gjithashtu, këto firma nuk bëjnë mbledhjen e plehrave në oraret e duhura, si dhe nuk kanë
vendosur një numër të duhur të kontenierëve të plehrave. Pastrimi i rrugëve
bëhet në mënyrë skandaloze. Pastruesit shihen vetëm në rrugët kryesore dhe në qendër, duke lënë zonat e tjera në mes të plehërave. Edhe makinat e plehërave janë të amortizuara, të cilat janë një faktor tjetër për ndotjen e ajrit..

Është paradoksale të mendosh që në Tiranë ku ndodhen institucionet qëndrore të shtetit, organizatat më të fuqishme joqeveritare vendase apo të huaja të ndodhi kjo histori me zhurmë të fortë. Të gjithë e dinë sa mijëra e miliona euro janë dhe po investohen për OJF-të apo OJQ-të në lidhje me këtë çështje plus fondeve që akordon shteti dhe masave ligjore që nxirren çdo vit dhe në fund asgjë nuk ndryshon. Çështja në dukje nuk është aq e thjesht, sepse është një konglomerat i tërë inertesh dhe njerëzish zemërinertë që në vend të zbatojnë ligjet dhe të rregullojnë mjedisin bëjnë kakofoni në media dhe ngrenë zërin nëpër zyra, duke e lënë terrenin në mëshirë te fatit.





Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 1096 here