10/29/2009 11:04:48 AM

Harasani, ja pse duam të kthehemi në Parlament

Intervista/ Një prej eksponentëve më të spikatur të grupit 'ndryshe' brenda selisë rozë, Andis Harasani, pohon se në Shqipëri aktualisht ekziston një situatë jo e qëndrueshme në politike. ‘PS, ka filluar një rrugë që nuk dihet ku po e çon’, por Rama, 'është dhe do të mbetet miku im'.

Doriana Metollari
drejtor@hermesnews.org
29 Tetor 2009

TIRANE - Situata politike në të cilën ndodhet sot vendi ynë, nuk është në nivelin e duhur për të përmbushur standardet europiane dhe këtë opozita ka filluar t’a vërë në dukje.

Ajo nuk pranon përgjegjësinë që shpesh herë ia ka atribuuar mazhoranca për bllokimin e procesit të integrimit të vendit.

Grupi i të ashtuquajturve ‘mendimi ndryshe’ po merr seriozisht idenë te kthehet të Parlament dhe pa Edi Ramën. Ky i fundit nga ana tjetër kërkon hapjen e kutive te votimit.

Një prej eksponentëve më të spikatur brenda ‘grupit të opozitarëve’, grup që preferon të quhet vetëm ‘ndryshe’, Andis Harasani, shpjegon arsyet pse socialistët duhet të ndryshojnë..

Pse doni të hyni në Parlament, lideri juaj Rama i bojkotoi punimet e tij..

Harasani: Për arsyen më të thjeshtë në botë. Kemi që nga Korriku i vitit 2005 që i kërkojmë votën popullit shqiptar, për qëllimin e vetëm që të ndryshojmë jetën në Shqipëri dhe për të çuar përpara të gjitha reformat e vendit drejt integrimit europian. Sot, ky proces është i bllokuar. Ne duhet te mësojmë nga gabimet e të kaluarës në politiken shqiptare, dhe te mos përsërisim ato ndërmjet viteve ‘98- ‘2000 të Berishës, aq më shumë të vitit ‘97.

Besoni se opozita po mban peng integrimin e vendit?

Harasani: Ajo që besoj unë, është se ekziston një situatë jo stabël në politikën shqiptare dhe kjo nuk ndihmon në integrimin e vendit në Europë. Nuk mund të them që po e mbajmë ne peng integrimin, por ajo qe më shqetëson është se kemi filluar një rrugë e cila nuk e dimë ku po na çon. Duke qenë të bindur se kutitë nuk hapen, nuk po shohin se si të dalim nga kjo situatë ku futëm veten.

Si do të mundet një 'mendim ndryshe' të ndryshojë
qëndrimin e opozitës në përgjithësi për kthimin në Parlament? Cila është rruga juaj?

Harasani: Duke qenë të ndershëm në radhë të parë me vetveten dhe duke i thënë gjerat siç janë. Duke vënë interesin e përgjithshëm mbi interesin personal. Është e qartë se kjo që filluam bëhet vetëm e vetëm që Partia Socialiste të reformohet, të riorganizohet dhe të bëhet e gati për zgjedhjet e ardhshme lokale e të përgjithshme. Unë personalisht nuk besoj se Rama mund të arrijë t’a çojë PS-në në fitore.

Atëherë kush do ta bëjë këtë?

Harasani: Këtë nuk mund ta dimë, te paktën jo tani për tani. Do ishte e pandershme të thuheshin emra. Unë di që Rama nuk ia arrin dot. Këtu nuk dua t’i heq asnjë presje asaj qe kam thënë para fushatës. Rama është një nga njerëzit më punëtorë që kam njohur dhe u mundua shumë, më shumë se kushdo tjetër brenda dyerve të Partisë Socialiste, ashtu siç ishte dhe e drejtë të ndodhte, por vota tregoi që nuk ia arriti. Ai nuk ia arriti dhe duke respektuar ato standarde qe janë norme në PS dhe qe vete Rama i ka kërkuar në kohën kur PS humbi në 2005-sën. Fushata që bëri me Z. Lakrori për mua nuk ishte fushatë.

Grupi juaj do të shkojë në Parlament dhe pa pjesën tjetër të opozitës nëse do të jetë e nevojshme?

Harasani: Sigurisht që po. Të gjithë e kemi pohuar këtë dhe njëkohësisht jam i bindur që jo vetëm ne të psetë, por do jenë shumë e shumë deputetë të tjerë të cilët nuk do ta digjnin mandatin e tyre. Në fund të fundit siç e thashë dhe në një TV kombëtar para disa ditësh, duhet të jetë i pari Rama që s’mund të na kërkojë të djegim mandatet për sa kohë dhe ai vetë nuk e lë mandatin e tij në Bashkinë e Tiranës.
Atëherë kjo lëvizje është fillimi i një ndarjeje politike brenda PS-së.. apo një mësim i duhet dhënë Ramës?

Harasani: As njëra dhe as tjetra. Ne duam që PS-ja të kthehet në ato vlera që ka patur e majta. Në thënien e mendimeve siç janë dhe në respektimin e rregullave. Nuk duhet vetëm t’i kërkojmë këto gjera tek të tjerët, por të fillojmë në radhë të parë tek vetja jonë. Ne 2003 Ngjela i kërkoi Ramës të hapte kutit dhe ai nuk pranoi. Sot së bashku me Ngjelën kërkon hapje kutish. Në 2005-sën i kërkoi me të drejtë Nanos te largohet dhe insistoi ne hapjen e Partisë e pranimin e fraksioneve. Sot që është vete në krye të saj nuk pranon asnjërën. Unë s’mund te jem dakord me një politikë të tillë.

A nuk ju duket dhe ju se politika Shqiptare e ka humbur pak vizionin e saj ndërkombëtar?

Harasani: Jo, nuk e besoj. Kjo pasi jetojmë në një bote që dhe nëse e humbet politika shqiptare, nuk e humbet faktori ndërkombëtar kujdesin dhe supervizionimin ndaj politikes shqiptare.
Kam përshtypjen se ju ka ngelur ende diçka pa i thënë ende Ramës..
Jo, në përgjithësi. Por, është diçka që ia kam thënë dhe po ia them. Rama ka qenë, është dhe do mbetet miku im. Unë besoj se vetëm miqtë e vërtetë i thonë gjerat siç janë. Unë do vazhdoj të mendoj që, dhe nëse ai largohet nga drejtimi i PS-se, duhet të mbajë patjetër rol në pjesën thelbësore te politikave dhe vendimmarrjes në PS. Rama nuk është thjesht kryetari i radhës por një figurë e rëndësishme e të gjithë politikës shqiptare.

Faleminderit për kohën Z. Harasani. Përgjigjet tuaja do të jenë me interes për lexuesit tanë.

Harasani: Faleminderit gazetës suaj, për hapësirën që më dhatë.





Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 740 here