10/28/2009 5:59:32 PM

Shqipëria po prek ekuilibrat botëror

Në politikën botërore problemet nuk maten me kilometra, por me lëvizjen e ekuilibrave aktual.

Nga Doriana Metollari
drejtor@hermesnews.org
28 Tetor 2009

Nuk është çudi të thuash se Shqipëria po prek ekuilibrat e politikës fluide botërore. Shpesh here dhe pas çështjeve krejt të vogla në dukje fshihen interesat e më të mëdhenjve.

Ja pse Shqipëria po bombardohet nga të katër anët me raportet e institucioneve ndërkombëtare, të manovruara në mënyrë shumë politike nga shtetet e europiane që nga ana e tyre kanë filluar të lëvizin gurët e vet të shahut.

Është marrë vesh se Europa sot është e ndarë për marrjen tonë të statusit vendit kandidat dhe jo për shkak të korrupsionit, apo trafikut të drogës, që dje për herë të parë morën përmasa alarmuese sipas raportit të fundit të Europol.

Europa nuk është e ndarë vetëm për këtë. Rumania nuk ma më pak korrupsion sesa Shqipëria, Italia jo me pak trafik, po ashtu si Franca etj.. por fati i tyre është i ndare dhe jo shume i ngjashëm me tonin.

Gjermania, dikur iniciatore e ndarjes se Ish Jugosllavisë, për shkak te interesave te saj ne Slloveni, sot po bën gjithçka për ta mbajtur peng, integrimin e Shqipërisë, meqë varet ne pjesën me te madhe nga gazi rus. Kjo e fundit së bashku me Serbinë nuk e njeh ende Kosovën.

Politika aktuale e Francës po merr kohë. Vetë deklaratat e Ministrit të Jashtëm Kushner flasin ende për një lloj lëkundjeje mes ‘po’-së dhe ‘jo’-së. Franca do të donte një integrim të vendeve të Ballkanit Perëndimor, nëse Ballkani nuk do të eksportonte konfliktin brenda ne BE.

Ky është thelbi: flas për stabilitetin i rajonit ballkanik. Europa sot është e ndarë në dy mendime bazë. Nga njëra anë janë ata që mendojnë se një integrim i bllokut brenda në BE do të shuante gjakrat brenda rajonit, nga ana tjetër, ata që i druhen kësaj dhe mendojnë se, nëse këto vende do të vazhdonin të ruanin hasmëritë e tyre dhe brenda kontekstit europian, do t'i importonin betejat brenda institucioneve, çfarë do të ishte shkatërruese për të ardhmen e BE-së.

Sigurisht nëse Serbia do ta njohe Kosovën, do t’ia lehtësonte me shume rrugën vendeve Ballkanike, por Beogradi nuk do ta bënte kurrë një gjë te tille pa lejen e Moskës.

Rusia do te bente lëshime në këtë pikë, vetëm nëse Bashkimi Europian angazhohet të minimizojë autoritetin Shteteve të Bashkuara të Amerikës në politikën ndërkombëtare. Por, meqë vendet e BE-së furnizohen në pjesën më të madhe nga gazi rus, nuk duket se po anojnë nga politika amerikane.

Shqipëria, kohët e fundit ka marrë mbi shpatulla dhe Kosovën, duke ruajtur me të një lidhje me shumë se politike, vëllazërore. Kjo ka përhapur dhe me tej frikën. Integrimi i Shqipërisë ne Europe nuk mund dhe nuk duhet të jetë i lidhur me fatin e Kosovës, meqë aktualisht shteti e Kosovës është ende në një fazë të brishtë, dhe në kontekstin botëror kjo lidhje nuk bën gjë tjetër vetëm nxit frikën e fqinjëve dhe të vendeve europiane për një rindezje të konfliktit në Ballkan.

Besoj se Shqipëria do t’i duhej me shumë Kosovës brenda BE-së dhe një distancë e qartë diplomatike do t'i bënte shumë mirë integrimit të saj. Të paktën një herë, të mos bëjmë lojën e shteteve europiane. Politika jonë e ka në dorë t’ia lehtësojë rrugën diplomacisë për një integrim të shpejtë në BE. Korrupsionin duhet t'a luftojnë me ndihmën e BE-së, por të mos harrojmë se thelbi është po ai. Në politikën botërore problemet nuk maten me kilometra, por me lëvizjen e ekuilibrave aktual.




Nëse po e dëgjon,
do të thotë se funksionon!






Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 715 here