10/19/2009 9:39:58 AM

Kur nuk bëhet opozitë

Aktualisht në Shqipëri nuk ka një opozitë. Ajo çfarë sot po bën Partia Socialiste është shkatërruese për të ardhmen e një vendi që aspiron për t’u bërë pjesë e Bashkimit Europian.

Nga Doriana Metollari
drejtor@hermesnews.org
19 Tetor 2009

Bojkoti i Ramës do të ishte demokratik deri në momentin që nuk do të cënonte interesat e asaj pjese të qytetarëve që e kanë votuar. Pas kësaj nuk besoj të ketë hapësirë për kokëfortësi.

Në momentin që ky qëndrim po e çon të majtën në izolim, po e hedh në një qoshe, automatikisht, ajo kërkon përdorimin e forcës për të treguar se ka të drejtë. Nxitja e forcës sjell kaos, kaosi anarki dhe në anarki, hynë në lojë shumë grupe interesi.

Aktualisht në Shqipëri nuk ka një opozitë. Ajo çfarë sot po bën Partia Socialiste është shkatërruese për të ardhmen e një vendi që aspiron për t’u bërë pjesë e Bashkimit Europian.

Me cilat baza, Shqipëria propozohet për t’u bërë pjesë e botës kur nuk ka as një oponencë në Parlament? Si do t’i përfaqësojë interesat e qytetarëve të majtë kur ajo nuk do t’i thotë ‘jo’ qoftë dhe një herë të vetme propozimeve të qeverisë?

Vendimi i Partisë Socialiste për të mos qenë prezent në Parlamend, po vë bazat e 'sistemit të diktaturës', pra të një Institucioni pa opozitë dhe selia rozë nuk mund të mbrojë kurrsesi votën e elektoratit të majtë, nëse nuk i përfshin këto interesa në qeverisjen e një vendi. Asnjë forcë politike nuk mund të bojkotojë Parlamentin, pa i kërkuar me parë 'leje' elektoratit të vet.

Unë nuk e di nëse Europa do të jetë më e qetë, nëse në pushtet do të ishin demokratët apo socialistët dhe besoj se nuk do ta shqetësonte shume ky fakt. Mesazhi i saj është diçka krejt tjetër, ajo kerkon metodën e qeverisjes, kjo është substanca e demokracisë, dialogu politik, mungesa e se cilës çon thuajse gjithmonë në lindjen e forcave ekstremiste.

Ja si lindi fashizmi në Itali, në vitet 1924. Opozita, kryeneçe bojkotoi parlamentin, si rrjedhojë mazhoranca filloi të merrte gjithnjë e më shumë vendime pa patur asnjë kundërshtar, asnjë oponence dhe kjo hodhi farën e diktaturës. Lindën protestat, por lindën tëpër vonë... opozitarët e asaj kohe u eliminuan.

Nuk dua t’i jap të drejtë, mazhorancës, apo t’i heq të drejtën për të bërë protesta opozitës, sepse kjo është demokratike dhe kushdo mund t’a kërkojë; ajo që me shqetëson është rezultati i këtij veprimi.

Shqipëria nuk ka nevojë për njerëz që tregojnë muskujt, qofshin këta demokratë apo socialistë, por për njerëz qe përdorin kokën, njerëz me shumë vizione, mbi të gjitha ka nevojë për energji të lira.





Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 557 here