10/17/2009 11:07:51 AM

14 vjeçari shqiptar që mrekulloi Broadway-n

Djaloshi Tomi, (Ehad Berisha) është dëshmitari i vetëm i një vrasje brutale në qytetin Kingfisher, Oklahoma. Në mes të kësaj ngjarjeje makabre, ndodhet vija që ndan një histori mes dy moralesh.

Beqir Sina/ New York
BeqirS@aol.com

BROADWAY (NEW YORK) - Ehad Berisha, quhet 14 vjeçari shqiptar, i cili me talentin e tij ka tërhequr vëmendjen e aktorëve të njohur të teatrit amerikanë si, Tim Blake Nelson, Richard Mawe, Shorey Walker, Valerie Redd, Judson Jones, Wlliam Franke, Benard Cummings, Matt Savings, Doug Sheppard dhe Helen Merino.

Shfaqja e tij në rolin kryesorë në "Theatre East" në premierën "Eye of God", të Tim Blake Nelson, vënë në skenë nga Lisa Devine, ai ka rolin e Tomit, në njërin prej skenave më të famshme në botë, teatrit të Nju Jorkut, Broadway, aty ku me qindra vite hodhën hapat e para yjet e hollivudit.

Një talent i rrallë, dominues dhe i përsosur në skenë. Kudo ku ka shkuar, në turne - kjo trupe teatrale, ka mahnitur adhuruesit e teatrit amerikan, kritikët e producentët e tjerë.

Katërmbëdhjetë vjeçari, vjen nga një familje shqiptare ardhur nga qyteti i Mamurrasit, me origjinë nga Kosova. Aktori i vogël shqiptar, e ka nisur karrierën e tij 4 vite më parë ku mori pjesë në një konkurs teatral në Los Angelos, - IPOP 2008, ku mori 3 çmime.

Ai zuri vendin e 3-te për TV Commercials, vendin e 3-të për (monologun) dhe vendin e 2-të si aktor ne vitit 2008. Pas kësaj Berisha ka luajtur një nga rolet kryesore për Komedy në shfaqjet teatrale në New York City.

"Syri i Zotit" - " Eye of God", Tim Blake Nelson

Producenti, aktori dhe shkrimtari i premierës "Syri i Zotit", Tim Blake Nelson, thotë për Hermesnews se, ''Ngjarjet e kësaj drame janë të vendosura në një lagje të qytetit Kingfisher në Oklahoma''.

Drama e shkruar nga Nelson, është një histori dashurie mes një gruaje te pafajshme, një çifti të rinj.

Ne këtë ngjarje e cila në skenë zgjat më shumë se një orë e gjysmë, interpreton trupa e teatrit "the East Theater", me aktorët Morgan Baker, Ehad Berisha, Benard Cummings, William Franke, Judson Jones, Helen Merino, Riçard Mawe, Valerie Redd, Matt Savins, Doug Sheppard, Shorey dhe Walker.

Pas shfaqjes së premierës në skenën e teatrit "The East Theater" në New York, ne i morëm këtë interviste Ehad Berishës

Si ishte emigrimi juaj në Amerikë, shkolla dhe rruga e aktrimit te moret?

Në gusht të vitit 1997 familja ime emigroi në SHBA. Unë kam qenë 2 vjeç, vëllai im Asllani 5 vjeç. Prindërit e mi, nëna Lavdia dhe babai Milazim Berisha, kanë lindur dhe kane jetuar në Mamuras, po ashtu edhe unë me vëllanë kemi lindur në Mamuras.

Kam lindur më 1 tetor të vitit 1995. Pas ardhjes në SHBA, kemi jetuar në një lagje shqiptarësh, në Brooklyn - NY, për 4 vite, ndërsa tani kemi 8 vite që jetojmë në Manhattan. Jam në vitin e parë të shkollës së mesme në NYCI.

Ehad, çfarë të nxiti që të bëhesh aktor? Kur e nise këtë karrierë?

Kam 4 vite që kam nisur këtë karriere. Kam qenë vetëm 10 vjeç kur për herë të parë kam konkurruar.

A u përballët me vështirësi gjatë kësaj rruge?

Po! Por, kam pasur mbështetje te jashtëzakonshme nga prindërit e mi, të cilët sakrifikojnë gjithçka dhe nuk kursejnë asgjë për mua dhe talentin tim. Kjo më ka ndihmuar shumë dhe ma ka bërë gjithsesi edhe më të lehtë këtë rrugë, plotë pasion.

Ehad, në mos gabohem, ju keni ka qenë i përfshirë në disa produksione teatrale në Booker T. Washington dhe Emily Dickinson School. Keni studiuar në John Robert Powers, New York. Përveç kësaj, jeni ai që keni fituar disa çmime si: "LA iPOP" ne aktrim komerciale dhe monologues. Dua t'ju pyes, Ehadi a do te behet një aktor i madh?

Pyetje e vështirë kjo për mua ! Pasi dëshira ime për t'u bërë një aktor i madh është një ëndërr e imja, por me duhet shumë punë për të arritur deri atje.

Cili qe rezultati i gjithë kësaj pune?

Si rezultat i kësaj pune 4 vjeçare kam pasur fatin të konkurroj në Los Agelos - IPOP 2008, ku pata sukses dhe fitova 3 çmime. Fitova vendin e 3- për TV Commercials, vendin e tretë për monologun dhe vendin e 2-të si aktor i vitit 2008. Pas kësaj kam luajtur një nga rolet kryesore për Comedy - net, një shfaqje teatrale për fëmijë këtu në New York City. Gjithashtu, në Korrik të këtij viti kam punuar me një këngëtar kanadez, për të pergatitur një videoklip, ku shpresoj do të ketë sukses pasi është jo vetëm një këngë por një mesazh për të gjithë fëmijët në botë. Por, suksesi më i madh ka qenë me Theater East, pasi kam pasur fatin të punoj me aktorë të njohur të skenës, dhe si rezultat i kësaj pune momentalisht jemi duke luajtur Eye Of God ne New York City. Jam shumë i lumtur që pata fatin të luaj një nga rolet kryesore në këtë premierë tipike njujorkeze, të Tim Blake Nelson, aktor i njohur, producent, dhe autor i disa filmave dhe skenës së teatrit Amerikanë.

Cilët janë idhujt e tu të artit skenik?

Hugh Lanrie, Adam Sandler, Ben Stiller, e shumë të tjerë.

Çfarë duhet të ketë një aktor 14 vjeç që e nis kaq herët karrierën, për të sukses?

Për të nisur një karrierë në moshë të re për mua është kuraja, besimi në vetvete, përkushtimi dhe pune e madhe në skenë.

A është Teatri, skena dhe interpretimi i juaj, gjithçka që ju ëndërroni?

Pyetje e bukur kjo - shumë të faleminderit! Ëndrra ime është padyshim për të pasur suksese si aktor por kam dëshirë në të njëjtën kohë për të mbaruar shkollën e mjekësisë.

Keni qenë ndonjë herë në Shqipëri, po në Kosovë?

Jo, nuk kam qenë as në Shqipëri e as në Kosovë, megjithëse me prindërit, të afërmit, miqtë dhe shokët, bëjmë një jetë si një Shqipëri. Kemi krijuar një Shqipëri të vogël" së bashku me komunitetin këtu në Nju Jork.

Por, sidoqoftë besoj se së shpejti do të vizitoj Shqipërinë dhe Kosovën.
Kanë qenë disa nga obligimet e mija në shkollë, teatër e tjera, që nuk më kanë dhënë gjerë tani mundësinë. Por, me zor po e pres të vijë vera tjetër dhe të shkojë në Shqipëri dhe në Kosovë, pasi babai im është nga Kosova.

Cfarë vlerësoni më shumë tek shqiptarët, në Amerikë?

Shqiptarët në Amerikë janë shumë të respektuar, kur thua që jam shqiptar sheh një respekt të madh nga të tjerët e sidomos nga amerikanët, që pas ngjarjeve në Kosovë, dinë më shumë për ne shqiptarët e historinë tonë. Kjo, pra më jep një kënaqësi të madhe shpirtërore, me jep forcë për të punuar sa më shumë për të arritur sa më shumë.

Cilat janë disa nga planet e tua për të ardhmen.

Do të vazhdoj me teatrin, por në të njëjtën kohë do të punoj me Tim Blake Nelson, pasi ai ka një projekt për një film që besoj do të realizohet vitin që vjen.





Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 1164 here