9/24/2009 10:46:34 AM

Tanush Shaskaj, universitet të mos varen nga politika

Ekskluzive/ Flet Rektori i Universitetit të Vlorës 'Ismail Qemali' Tanush Shaskaj: 'Me gjithë insistimin tim për te gjetur një rruge te ndërmjetme, Senati dhe gjithë kolektivi i pedagogeve janë plotësisht kundra idesë qe këta studente te vijnë ne UV. Pra ne do te pezullojmë regjistrimin e gjithë studenteve me mesatare nen 6 derisa te kemi një vendim gjykate për këtë çështje.'

Nga Doriana Metollari
drejtor@hermesnews.org
24 Shtator 2009

VLORE - Universiteti i Vlorës 'Ismail Qemali' rikthehet në qendër të opinionin publik, pas urdhrit te dhënë nga Senati i këtij Universiteti për mospranimin e studenteve qe kane mesataren nen notën 6.

Urdhri ka sjelle një përplasje te vërtete me Ministrinë e Arsimit dhe te Shkencës, e cila nga ana tjetër ka urdhëruar regjistrimin e këtyre studenteve neper bankat e shkollave.

Rektori i Vlorës, Tanush Shaskaj pretendon se Ministria ka qenë në dijeni të këtij urdhri shumë kohë përpara dhe ngulmon në faktin se 'MASH duhet t'a kishte futur këtë kërkese në formularin e studenteve'.

Me një fjalë, beteja vazhdon dhe fakt është që shumë studentë ende nuk janë regjistruar në asnjë Universitet. Për Rektorin Shaskaj mund të ketë dhe rrugë të mesme, por, hë për hë ‘pozicionet tona janë shumë larg me njëra-tjetrën’.






Çfarë po ndodh realisht në Universitetin e Vlorës?

Nuk po ndodh shumë, përveç faktit qe disa prindër pretendojnë te regjistrojnë fëmijët e tyre me zor ne UV. Puna jone është penguar këto dite dhe mendojmë se do te krijojë probleme në fillimin e fazës se dyte te regjistrimeve ne 25 shtator.

Keni deklaruar se do te mbyllni Universitetin e Vlorës? Vazhdoni t’i qëndroni ende këtij mendimi?

Natyrisht qe është vendimi i fundit qe unë dua te marr, por primare për mua ne këto momente është siguria e stafit dhe siguria e institucionit. Ne jemi te detyruar te përplasemi me individë te pakontrolluar dhe ne shumicën e kohës ne ambientet e universitetit nuk ka prezence policie. Viti akademik ka me pak rendësi për ne, sesa siguria e stafit dhe e studenteve te tjerë. Qofte edhe një student apo pedagog te gërvishtet, kjo do te acaronte gjithë ambientin. Ne se siguria cenohet unë do te urdhëroj mbylljen e Universitetit te Vlorës deri ne qetësimin e situatës dhe sigurimin e cilësisë. Me veprimet dhe deklaratat qe vijnë nga MASH ne kemi dyshimet tona ne se viti akademik do te filloje normalisht.

Flitet se studentet u njohën me këtë urdhër nga ana e Senatit, vetëm pas provimeve. Pse?

Nuk është aspak e vërtetë. Lajmi ka qene i shpallur ne faqen e internetit te Universitetit qe nga Marsi i vitit 2008. Gjate gjithë kohës ne e kemi shpallur këtë ne media lokale dhe kombëtare, ne intervista, ne biseda televizive etj. Madje gjate fushatës elektorale Ledi Shamku gjate një debat televiziv me përfaqësues te Ministrisë se Arsimit ka thëne se "PS e mbështet iniciativën e Senatit te Vlorës për futjen e mesatares ne pranimet ne universitete". Si mund te pretendoje MASH se ata nuk e dinin këtë pune. Perse nuk hapin arkivat për te gjetur shkresat tona te protokolluara.

Persë i përket çështjes se kur e morën vesh studentet për këtë është përgjegjëse MASH. MASH duhet t'a kishte futur këtë kërkese ne formularin e studenteve. Ne e kemi reklamuar këtë lajm me te gjitha format e mundshme.

Ende ne nuk kemi një përgjigje te sakte perse MASH e refuzon këtë rregull i cili është aprovuar sipas Ligjit ne fuqi. Nuk janë respektuar procedurat apo ne si Universitet nuk kemi te drejte për te vendosur rregulla te tille? Nga MASH dalin sinjale kontradiktore.

Ne Ligjin shqiptar thuhet se ne qofte se një institucion qeveritar nuk kthen përgjigje brenda 30 ditëve atëherë çdo propozim hyn ne fuqi. Ne se propozimi ynë ishte i paligjshëm, perse MASH nuk reagoi dhe te na vinte ne dijeni? Ne këtë mënyrë do te ishte shmangur gjithë kaosi dhe rrëmuja.

A i prisnit reagimet e Ministrisë dhe ato te Studenteve?

Ne asnjë mënyrë unë nuk prisja qe MASH do te injoronte hapur Ligjet e miratuara nga parlamenti shqiptar, do te shkelte me te dy këmbët autonominë akademike, dhe do t'a kthente gjithë sistemin universitar ne Shqipëri ne një gjendje kaotike thjesht për te mbuluar gabimet dhe shkeljet e hapura te ligjit nga Drejtoresha e Arsimit te Larte.

Sa për reagimin e studenteve ai është i nxitur nga MASH. Strategjia e MASH-it është e qarte, te nxisë opinionin kundra UV dhe te na detyroje ne te pranojmë diçka qe është e jashtëligjshme. Makina mediatike pro-qeveritare është hedhur kundër meje megjithëse ky debat nuk ka aspak te beje me mua personalisht.

Keni deklaruar se: ‘MASH po e shkel ligjin me të dyja këmbët, ne do ti drejtohemi Gjykatës së Lartë, madje edhe Strasburgut’..

Ne kemi një grup juristesh qe po bëhen gati. Me gjithë insistimin tim për te gjetur një rruge te ndërmjetme, Senati dhe gjithë kolektivi i pedagogeve janë plotësisht kundra idesë qe këta studente te vijnë ne UV. Pra ne do te pezullojmë regjistrimin e gjithë studenteve me mesatare nen 6 derisa te kemi një vendim gjykate për këtë çështje. Kështu zgjidhen problemet ne te gjitha vendet demokratike, dhe kështu duhet te zgjidhen edhe ne këtë rast. Besoj se MASH nuk do te jete kundër zgjidhjes ligjore te problemit.

Në të njëjtën kohe ne kemi një grup vullnetaresh, pedagoge e studente, te cilët po kontaktojnë gjithë institucionet ndërkombëtare si UNESCO, OKB, BE, ambasadore te vendeve te huaja, gjithë organizatat profesionale te pedagogeve ne Amerikën e Veriut dhe ne Europe. Ka nisur një beteje qe nuk ka te beje vetëm me pranimin ose jo te studenteve, por ka diçka me te thelle brenda "varësinë e universiteteve nga politika". Ne si UV kërkojmë mbështetjen e gjithë universiteteve publike qe edhe universitetet shqiptare te kenë statusin e gjithë universiteteve perëndimore dhe jo te jene kukulla ne duart e politikes.

Ka inate te vjetra mes Universitetit te Vlorës dhe Ministrisë se Arsimit?

Nuk mund te them se ka pasur përplasje, por kemi pasur probleme pune dhe debate. Zoti Tafaj, megjithëse nuk ka qene Ministër ne ato periudha i njeh disa nga problemet. Ne jemi ankuar ne MASH disa here për programet e reja, për injorimin e plote te kuotave te pranimit te sugjeruara prej nesh, për favorizimin e universiteteve private dhe diskriminimin e universiteteve publike. E keqja është se ne jemi një zë i vetëm. Askush nuk ka kurajën nga universitetet e tjera te flasin hapur edhe pse ne e dimë mjaft mire se te gjithë janë ne anën tone. Është mire qe personalitet e shkencës, profesorë te vjetër te shprehen se çfarë mendojnë ata mbi pranimin ne universitetet tona te nxënësve me mesatare 5.

Problemet kryesore kane ardhur kryesisht për programet. Ende nuk kemi një përgjigje zyrtare mbi programet e propozuara nga Senati Akademik ne 15 mars 2009. MASH ende nuk ka shpjeguar perse universiteteve private dhe shume universiteteve te tjera publike këto programe u janë miratuar qe ne qershor edhe pse kane aplikuar pas Universitetit te Vlorës.

A ekziston një rrugë e ndërmjetme në gjithë këtë?

Patjetër qe ka. E keqja është se çdo vendim qe do te merret duhet te aprovohet nga Senati i UV-se dhe nga MASH. Pozicionet e tyre janë tepër larg njëra-tjetrës dhe unë jam pesimist sot me shume se 2 dite me pare. Personalisht, jam ne një pozicion tepër te vështirë sepse z. Tafaj e konsideroj mik dhe kam mjaft respekt për te si njohës i mire i arsimit, por unë jam i detyruar te zbatoj edhe rregullat e institucionit ku punoj dhe te mos le ne balte gjithë koleget e mi te cilët besojnë se ky është një vendim ne te mirën e UV-se dhe arsimit shqiptar. Ky është një problem i trashëguar i cili nuk zgjidhet lehte.

Senati dhe gjithë kolektivi i UV-se është totalisht kundër pranimit te këtyre studenteve. Shumica dërrmuese e anëtareve te stafit pedagogjik janë te prere se do te bojkotojnë mësimin përfundimisht ne se këta studente futen ne auditorët tona. Duhet te kuptoni se pjesa me e madhe dhe me influence e stafit pedagogjik te Universitetit te Vlorës janë te rinj dhe te reja te diplomuar jashtë, idealiste, te cilët nuk kane ardhur ne Vlore për te marre një rroge, por sepse besojnë te idealet e një universiteti shkencor, elitar, me nivel te larte akademik. Duket se kjo është diametralisht e kundërt me idenë qe ka MASH për universitetin tone.

Për momentin zgjidhja me e mire është qe këta studente dhe prindërit e tyre te rrinë larg dyerve te UV-se. Te presim disa dite derisa gjykata te japë një përgjigje te sakte për problemin dhe pastaj unë dhe z. Tafaj te gjejmë një rruge te mesme.

Alternativa tjetër është qe këta studente te shpërndahen ne universitete te tjera te cilat kane probleme me regjistrimet e pakta. P.sh. perse këta studente te mos shkojnë ne Gjirokastër, Shkodër, Korçe, Peshkopi, Sarande, apo Elbasan? Këto universitete i mirëpresin këta studente dhe shifrat e regjistrimeve ne këto universitete janë sa 25 - 30 % e shifrave te studenteve te regjistruar ne UV.

A ka te drejte Universiteti i Vlorës, ligjërisht te kundërshtoje një urdhër te Ministrisë se Arsimit ?

Kjo është një pyetje qe gjykatat shqiptare do t'i përgjigjen ne javët qe vijnë. Pyetja e sakte do te ishte, a ka te drejte Ministri i Arsimit dhe Shkencës te urdhëroje Rektorin e një universiteti? Rektori është i zgjedhur dhe drejton një institucion te pavarur dhe autonom. Unë vete nuk jam i qarte se çfarë është përgjigja e pyetjes se mësipërme sipas Ligjit shqiptar. Për anallogji, me duket se Kryeministri nuk mund t'u japë urdhra kryetareve te bashkive. Nga ana akademike unë jam i bindur se Ministri i Arsimit ne asnjë mënyrë nuk duhet te jete ne gjendje te urdhëroje Rektorin. Ne se ndodh kjo atëherë universiteti është thjesht një vegël e qeverise.

Studentet e dobët një dite do t’i eliminonte koha, nëse nuk do te kishte dhe profesorë te korruptuar. A jeni dakord me këtë?

Aspak dakord, kjo s'ka fare lidhje me korrupsionin e pedagogeve. Korrupsion ndoshta, por jo i pedagogeve. Ne gjithë boten ka universitete te mira dhe universitete te dobëta edhe pse pedagoget nuk janë te korruptuar. Ne Vlore synojmë qe te jemi një universitet qe te konkurrojmë ne cilësi jo vetëm ne Shqipëri, por edhe ne bote. Disa njerëz bezdisen nga kjo ambicie e jona. Shume janë përpjekur te na vene shkopinj ne rrota. Fakti qe ne kemi rreth 10 profesorë te huaj me kombësi jo-shqiptare te cilët janë gjithë kohen ne Vlore, fakti qe cilësia e aplikanteve te UV-se po rritet ndjeshëm, aktiviteti shkencor është me i madh se kurrë, shqetëson disa grupe te caktuara qe u intereson qe universitetet shtetërore te jene te një niveli skandaloz. Mendoni se janë 36 universitete private qe mbijetojnë vetëm e vetëm duke i meshuar idesë se universitetet publike janë te dobëta. Është formuar një lobing mjaft i forte i këtyre universiteteve private. Dhe me sa duket viktima e radhës do te jete arsimi i larte publik. Këto pak universitete publike qe ka sot Shqipëria janë pasuria me e madhe kombëtare e saj. Mbani mend se kur ato te shkatërrohen, do te jete pothuajse e pamundur te ringrihen serish.



Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 2005 here