9/23/2009 4:32:40 PM

Nertil Agalliu, sfidat e një gazetari

Ekskluzive/ Flet kryeredaktori i parë i një radio universitare: 'Një gazetar i mirë dhe profesionist bëhesh vetëm me punë dhe 1% duhet talent, çka do të thotë se çdo gazetar në botë ka arritur aty ku është në saj të investimit që ka bërë në veten e tij dhe kjo është bërë me sakrificë.'

Nga Isidor Koti
Drejtor i Radiostinët
23 Shtator 2009

TIRANE - Nuk është thjesht një zbulim mediatik. Në dukje të jep përshtypjen se është një djalë si gjithë të tjerët.

Ai mban një histori të pashkruar ende, por më vonë do të kujtohet dikush që të lexojë në këtë intervistë për ta përmendur në historinë e radiofonisë shqiptare.

24 vjeçari Nertil Agalliu, në të parën radio universitare, e çelur tre vite më parë në Universitetin e Elbasanit, ishte kryeredaktori më në zë që e udhëhoqi radio “Universiteti” drejt preferencave më të spikatura publike.

Puna e palodhur dhe përkushtimi, dashuria e madhe për radion e kthyen në një ndër zërat më të njohur dhe më të përfolur.

Kjo është intervista e parë që sjell në vëmendjen publike një personash shumë interesant, tashmë i përditësuar me radiotelevizionin në Tiranë.

Në vijim, Nertil Agalliu rrëfehet eskluzivisht për Hermesnews.







Mirë se të gjeta. Nuk ndodh shpesh që një pedagog të intervistojë ish-studentin e tij, por unë e kam për krenari që të përulem para personalitetit tënd që tashmë ka hyrë në historinë mediatike universitare, si kryeradaktor i të parës radio të këtij lloji në Shqipëri. Na tregoni diçka rreth vetes dhe më pas si lindi ideja për radion dhe çfarë pune keni bërët aty?

Së pari mirnjohje e madhe edhe për ju që më keni mbështetur gjatë studimeve të mia në degën e gazetarisë në Universitetin e Elbasanit, por edhe për mbështetjen e palodhur që më keni dhënë gjatë punës time në radio “Universiteti”. Për mua ka qenë një eksperiencë shumë e mirë në aspektin profesional dhe këtë që e kuptoj më shumë sot sesa atëherë. Aty sigurisht që kam mësuar shumë gjëra, të cilat më kanë shërbyer që në punën time të përditshme në media të jem më i vendosur më i lirë dhe sigurisht më i përgatitur. Unë kam qenë një prej atyre njerëzve të cilët krijuam atë radio dhe së bashku me disa kolegë të mi e vumë në jetë. Ishte një radio sprovuese për të përgatitur gazetarë të rinj në treg. Aty secili prej nesh arriti që të mësonte shumë nga profesioni. Pas eksperiencës në atë radio shumica prej nesh që punuam aty, sot jemi ne media të ndryshme në Tiranë.

Si u prit nga publiku universitar dhe ai jashtë universitar në Elbasan kjo radio?

Në fillim ishte një ide. Askush nuk besonte të shkonim aq larg, madje mund të them se sot të gjithë ata që nuk besuan në atë projekt tani kanë ndërruar mendje dhe për këtë jam i lumtur. Ne ishim brezi i parë i studentëve, të cilët fituam shumë nga ajo radio.

Aty nisëm të mësonim ç’është lajmi, filluam nga java në javë të mësojmë se pas gabimeve vjen përgjegjësia dhe frytet e saj duken sot te të gjithë ne. Mendoj se dhe stafi akademik në Elbasan e vlerësoi shumë dhe na mbështeti. Më vjen keq që sot ajo radio nuk funksionon më si dikur, por përveç Universitetit, duhet të jenë studentët ata të cilët duhet të këmbëngulin që të rifillojë ajo radio. Është një eksperiencë e madhe dhe shumë e nevojshme.

Pasi përfunduat studimet në degën e gazetarisë erdhët në Tiranë, duke u pozicionuar në një televizion të rëndësishëm ku dhe vijoni të punoni...

Që prej dy vjetësh jamë pjesë e një prej televizioneve më të mirë informativë në Shqipëri “Ora Neës”. Për këtë dua të falenderoj ish- profesorin tim Avni Nezaj që më krijoi këtë mundësi, por edhe Drejtorin e përgjithshëm të Televizionit Alfred Peza, i cili më bësoi deri në fund. Pprej dy vjetësh në Ora Neës kemi krijuar tashmë formatin tonë sportiv me dy edicione sportive në ditë, por edhe në fundjavë me emisione me të ftuar analiza dhe komente. Tani, me hapjen e radios ka nisur i pari emision me formatin radioteleviziv sportiv në Shqipëri.

Cilat janë disa nga vështirësitë me të cilat përballet një gazetar i ri gjatë punës së tij?

Unë mendoj se profesioni jonë si gazetarë është po aq i vështirë sa profesioni i politikanit, i ekonomistit apo i doktorit. Pra nëse arrin të punosh dhe të shikosh se me punë arrihet gjithçka, atëherë nuk mendon se vështirësia do të sfidojë. Nuk ka punë pa vështirësi, por mendoj se sot gazetaria në Shqipëri nuk ka më ato peripeci si dikur, sot bota ka evoluar dhe gazetari ka tashmë shumë mundësi për të bërë. Sot ekziston telefoni, interneti, një superteknologji që po “çmend” botën.

Brenda kësaj eksperience që ke fituar në gazetari, si mund të bëhesh i suksesshëm në këtë profesion?

Unë kam një bindje të thellë dhe të pakthyeshme se për tu bërë gazetar sot nuk duhet vetëm talenti. Një gazetar i mirë dhe profesionist bëhesh vetëm me punë dhe 1% duhet talent, çka do të thotë se çdo gazetar në botë ka arritur aty ku është në saj të investimit që ka bërë në veten e tij dhe kjo është bërë me sakrificë.

Dhe në përfundim, çfarë mesazhi dëshiron t'ju përcjellësh gazetarëve të rinj dhe studentëve që ndjekin studime për gazetari?

Unë jam partizan i idesë që çdo student i gazetarisë njëkohesisht duhet të përkushtohet në punë gjatë kohës që studion. Për hir të së vërtetës, sot në Shqipëri askush nuk behet gazetar nga auditori por nga praktika dhe terreni. Auditorët në vendin tonë, me tërë respektin që kam për ta, nuk janë në nivelin e asaj që pritet. Praktika dhe puna është ajo që mund ta bëjë një gazetar të aftë dhe të denjë për tregun e medias.



Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 903 here