9/18/2009 10:08:49 AM

Letra avokatit/ Si të divorcohem nga im shoq?

Bashkëshorti im është njeri i dhunshëm dhe dua të ndahem. Ju lutem më tregoni si të sillem?

17 Shtator 2009
info@hermesnews.org

I nderuar Zoti Avokat,

Jam një zonje që kam nevoje për një përgjigje nga ana juaj. Jam e martuar qe ne vitin 1987 dhe kam dy fëmije përkatësisht 20 vjeç dhe 14 vjeç. Pas një jete te gjate dhe te mundimshme bashkëshortore kam vendosur te divorcohem. Bashkëshorti im është njeri i dhunshëm dhe nuk kemi asnjë pike te perbashket, nuk arrijmë te flasim dot se ai vetëm bërtet dhe ushtron dhune psikologjike dhe ka arritur deri ne kërcenim me jetën time, pasi i thashë se do iki nga shtëpia. Dua te di se si duhet te veproj, ju bej te ditur se unë jam fëmijë i vetëm dhe ai ka ardhur ne shtepine time (dhëndër brenda). Shtëpia është ne emër te babait tim por fatkeqësisht kur u be privatizimi u vu dhe emri i tij. Per momentin ne shtëpi jetojmë unë, ai, dy fëmijët dhe nena ime pasi babai ka nëntë vjet qe s’është me. Ju lutem me jepni një këshillë dhe me thoni ne këto kushte si mund ta nxjerr nga shtëpia dhe ç'fare mund te përfitoj ai nga kjo ndarje se une personalisht dua vetëm qe ai te iki dhe te na lere te qete. Jam ne pritje te përgjigjes suaj mundësisht sa me shpejt dhe te me rekomandoni se kujt mund ti drejtohem për ndihme.

Me respekt zonja nga Tirana.
Jam ne pritje te përgjigjes suaj

E nderuar Zonje!

Duke shprehur keqardhjen time për gjendjen ne cilën ndodheni, po ju përgjigjem, përgjithësisht, pa humbur kohe - ne pritje te hollësive te nevojshme për një sqarim dhe këshillim me specifik.

Ne radhe te pare do te doja te analizoja aspektin me te ashpër dhe me kritik te situatës tuaj, qe është i lidhur me ligjin penal.

Hapi i pare, sipas mendimit tim, është pritja e një momenti (te ardhshëm) te tensionuar, ne te cilin burri do te rishpreh dhunën (psikologjike apo fizike) ose kërcënimin ndaj jush, ne praninë e personave te tjerë.

Ne këtë rast menjëherë duhet bere një denoncim ne polici, duke specifikuar kërkesën e largimit te tij te menjëhershëm nga shtëpia për arsye te rrezikshmërisë qe sjell prania e tij ne familje për ju.


Av. Lulzim Hamitaj
info@studiolegalehamitaj.com
00 39/ 06 3225895

Ky veprim hap rrugën e lëvizjeve te mëtejshme. Ne rast se ne vazhdim te denoncimit - ne vartësi nga marrja apo jo e masës paraprake te mësipërme - do te hapet një gjyq penal kundër tij, mund te pritet fundi i gjyqit penal ose mund te çelet ndërkohë edhe gjyqi civil për ndarje. Kuptohet qe mungesa e një (ose me shume) denoncimi-ve e bën me te vështirë dhe me te gjate gjyqin e ndarjes, pasi duhet te verifikohen arsyet e ndarjes (duke qene se burri nuk është dakord) ne fushën civile.







Përsa i përket aspektit te (pronësisë se) shtëpisë mund te bej vetëm disa hipotizime, pasi lajmet (jo te plota dhe konfuze) ne dispozicion - lidhur me pronësinë aktuale te saj - nuk me lejojnë te jap një përgjigje te përpikte.

Gjithsesi, fillimisht do te specifikoja qe ligji mbi trashëgiminë (pa testament) parashikon kalimin e pronës nga trashegimlenesi tek bashkëshorti dhe tek fëmijët ne pjese te barabarta. Pra, Zonja, duke qene fëmijë e vetme, ka trashëguar gjysmën e shtëpisë (ashtu si nena e saj ka trashëguar gjysmën tjeter) nëse ne momentin e vdekjes se babait, shtëpia ishte tërësisht mbi emrin e tij.

Nuk jam ne gjendje te vlerësoj (pa lexuar dokumentet) nëse futja e emrit te burrit bere si pronar apo është bere si shfrytëzues i banesës (si anëtar i familjes), ose te shprehem mbi ligjshmërinë apo paligjshmërinë e njërit apo tjetrit veprim.

Ne çdo rast, duke u përqendruar te pyetja kyç: si mund te nxirret burri jashtë pa te drejte mbi shtëpinë, unë do te sugjeroja verifikimin e dokumenteve njëkohësisht me veprimtaritë e mësipërme.

Nëse ne fund çështja do te arrije për ndarje ligjore, dhe burri do te rezultojë me pjese (te ligjshme) ne shtëpi, duhet pare gjendja ne një prizëm me te gjere: nëse ai punon dhe ka te ardhura, nëse fëmija 20 vjeç studion. Dhe ne baze te te dhënave te mësipërme, mund te tentohet një kompromis ndarje, nepermjet te cilit burri pranon te heq dore nga pjesa e pronësisë, dhe si kompensim gruaja refuzon (humbet) te drejtën e trajtimeve ekonomike qe i takojnë.

Me ne fund do te shtoja qe, pavarësisht nga pozicioni i pronësisë, ekziston gjithmonë mundësia e largimit fizik te burrit te dhunshëm nga shtëpia (por pa cenuar pronën e tij), nepermjet një vendimi gyqi te posaçëm, kur arrihet te provohet rrezikshmëria e tij për familjen.

Duke shpresuar dhe uruar qe çështja te zgjidhet sa me shpejt, në mënyrën me pak te dhimbshme qe te jete e mundur, (ndoshta me rregullimin e sjelljes se burrit, mbas denoncimit te pare), po pres lajme mbi zhvillimin e ngjarjeve. // Keni një pyetje për rubrikën tonë (Letra avokatit)? Na shkruani në info@hermesnews.org //



Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 745 here