9/11/2009 4:42:54 PM

Murataj, krimi kufitar më i përhapur në Gjirokastër

Intervistë/ Flet Zv. Drejtori i Policisë së Qarkut Gjirokastër Halit Murataj: 'Kufizohemi me një vend të Bashkimit Europian dhe ndeshemi me tepër me krime të zonave kufitare si, kontrabandimi i njerëzve, mallrave, trafiku i lendeve narkotike.'

Nga Doriana Metollari
11 Shtator 2009

Si paraqitet lufta kundër krimit ne krahasim me një vit me parë në Qarkun Gjirokastër?

Halit Murataj: Mjaft pozitive. E them këtë sepse, nga viti ne vit janë evidentuar rezultate ne rritje dhe ne përputhje me prioritetet e Policisë se Shtetit e ligjin. Këto arritje pozitive nuk vërehen vetëm ne strukturat tona lokale por ne përgjithësi ne strukturat e Policisë ne shkalle vendi. Për këtë dua te krahasoj rezultatet e dy viteve te fundit 2008-2009. Në vitin 2008 janë evidentuar 392 vepra penale nga te cilat janë zbuluar 315 ose 80.3% e tyre. Për te njëjtën periudhe te vitit 2009 janë evidentuar 318 vepra penale nga te cilat janë zbuluar 259 ose 81.5% e tyre, te ndara sipas sektorëve. Pra kemi një panorame pozitive dhe ne mënyrë te dukshme kemi ulje te veprave penale ne përgjithësi e rritje te zbulueshmerise ne veçanti.

Ku është përqëndruar më tëpër vëmendja juaj?

Halit Murataj: Vëmendja e shërbimeve tona është përqendruar me shumë në trajtimin ligjor te konflikteve si mjet për parandalimin e veprave penale dhe krimet ne familje. Themi se rezultatet janë me pozitive pasi shërbimet policore janë prezentë si ne zonat rurale ashtu dhe ato urbane.

Cila është e veçanta e kriminalitetit ne këtë Qark?

Halit Murataj: Terreni ku vepron dhe faktorët qe e favorizojnë, forma e veprimit për te arritur objektivat e tij. E veçanta e territorit tone është kufizimi me një vend te bashkimit europian i cili importon apo eksporton asete me përfitim reciproke ne te dy drejtimet nga subjektet kriminale. Ne këtë kontekst e veçanta jone është se ndeshemi me krime te zonave kufitare siç janë kontrabandimi i njerëzve, mallrave, trafiku i lendeve narkotike, fshehja e pastrimi i produkteve te veprave penale dhe kultivimi i bimëve narkotike ne një zone te kufizuar me mjaft probleme. Po kështu po ndjekim dhe studiojmë tendencat qe kane te bëjnë me shkatërrimin e pasurive natyrore me vlera te parikuperueshme me apo nga pakujdesia.

Si do t'i vlerësonit marrëdhëniet polici-komunitet?

Halit Murataj: Të rëndësishme. Marrëdhëniet polici - komunitet janë të rëndësishme për emancipimin dhe jetën e një shoqërie dhe si të tilla janë një nga prioritetet kryesore të punës sonë. Ligji për Policin e Shtetit neni 122 i tij përcakton se Policia është organizate ne shërbim te qytetareve dhe siguria nuk është sipërmarrje vetëm e policisë por është përgjegjësi e gjithë institucioneve shtetërore e lokale. Strukturat e shërbimet e policisë kane realizuar dhe vazhdojnë te kenë kontakte, konsultime dhe diskutime me komunitetin për identifikimin e konfigurimin e veprave penale e shkeljeve te ligjit, shqetësimeve, problemeve, mënyrën e trajtimit, zgjidhjen, shërbimet qe kërkohen nga grup moshat, shtresat shoqërore, grupet e biznesit etj. Në ketë këndvështrim marrëdhëniet polici-komunitet janë reciproke, te domosdoshme, për komunitetin ne zhvillimin e tij shumëplanesh, arsimor, kulturor, shoqëror.







Aksionet e policisë për zbulimin e rrënjëve te mbjella me kanabis janë te shpeshta..megjithëse te njëjtën gjë nuk mund te themi për zbulimin e autoreve...

Halit Murataj: Në radhë të parë me lejoni t'ju them se, puna është përqendruar ne parandalimin e këtyre veprave ne fushën e narkotrafikut si dhe ne dokumentimin ligjor te atyre te evidentuara duke bashkëpunuar ngushte me Prokurorinë. Aktualisht për vepra penale te kryera ne fushën e narkotrafikut kemi ne kërkim 20 persona nga te cilët 14 prej tyre janë te dënuar me vendime përkatëse dhe 6 prej tyre janë me mase sigurie arrest ne burg pa afat. Po kështu nga këta persona 11 janë për veprën penale te kultivimit te bimëve narkotike nga te cilët 10 janë persona me banim ne fshatin Lazarat, 9 persona janë ne kërkim për veprën penale te trafikut te lendeve narkotike po nga fshati Lazarat. Puna për kapjen e këtyre personave është e normuar dhe vazhdon me intensitet te larte deri tani nga ana e jone per keto tendenca janë kapur 5 persona. Per sa i perket kultivimit te canabis sativa këtë vit krahasuar me nje vit me pare kemi nje renje drastike si rezultat i masave dhe punës se policisë, por dhe bashkëpunimit me te gjithë agjencitë e zbatimit te ligjit dhe pushtetin vendor.

Një gjë e tillë vlen dhe për komunën Lazarat..?

Halit Murataj: Për sa i përket Komunës Lazarat e njohur si zone me probleme ne kultivimin e Canabis sativa kete vit qe ne fillim te sezonit te kultivimit, si bllokimi i një numri te madh automjetesh qe transportonin pleh dhe uje, prerja e tubave te ujit ne lumin drino, mbajtja nen kontroll pa ndërprerje 24 ore e aksit rrugor Gjirokastër Dervicjan, vënia para pergjegjsise ligjore te inspektoreve te policisë se rendit , apo te zgjedhureve vendore, goditja e trafikut te lendeve narkotike qe dilte nga Lazarati ne akset rrugore, ne pikat e kalimit apo ne kufirin e gjelbër, ku vetëm kete vit jane sekuestruar rreth 5 tone Mariuane, beri qe numri i bimëve Canabis Sativa te mbjella te minimizohet ne maksimum, po ta krahasojmë ne përqindje këtë vit ne Lazarat kemi rreth 70-80% me pak se vitin e kaluar, kjo tendence gjithnje e ne renie e ekultivimit qe cituam është ne kete nivel edhe ne te gjithë qarkun, pasi vitin e kaluar shkatërruam mbi 30 mije rrënjë kanabis, ndërsa këtë vit kemi rreth 7 mije rrënje bime te shkatërruara ne te gjithë qarkun.

Cfare pune është bere dhe po bëhet për trajnimin e agjenteve te policisë në rritjen e përgjegjsisë e nivelit profesional?

Halit Murataj: Ne kërkojme gjithnje efektive dhe personel te përgatitur për te përballuar sfidat kriminale te kohës, për te përpunuar mendimin e tendencat kriminale, për tu infiltruar ne brendësi te tyre për tu ndeshur dhe për ti vene kriminelet perpara pergjegjsise ligjore. Për këtë qellim efektivat e policisë dhe veçanërisht ata te Departamentit te hetimit te krimeve u nënshtrohen trajnimeve dhe testeve fizike. Për vitin 2009 janë kryer 1544 ore trajnime te cilat kane synuar perfeksionimin e përdorimit te teknikave te hetimit, vëzhgimit, infiltrimit e përgatitjen sa me te lart fizike. Ky intensitet i punës ne këtë drejtim do te intensifikohet mbi bazën e një tematike te përcaktuar pranë A.R.Publik dhe sipas Drejtorive përkatëse e problematikes qe haset e objektivat qe kërkohen te arrihen.

Cilat janë problemet me emergjente që ka sot policia?

Halit Murataj: Mendoj se emergjenca nuk ka. Probleme po dhe kryesisht ato janë: Krijimi i kushteve e ambienteve sa me komode e bashkëkohore, investime te cilat sa jane promovuar dhe përfundojnë ne vitin 2010. Paisja e modernizimi i bazës materiale-teknike dhe zotërimi i teknologjisë larte. Reformimi i shërbimeve dhe ngritja e nivelit tekniko-profesional e fizik.



Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 586 here