9/8/2009 9:17:24 AM

Përse nuk jemi të lumtur?

Harmonia e njeriut. Shkencëtarët thonë se të qënit i lumtur është relative tek individi të ndryshëm. Kjo në varësi të përjetimeve dhe gjendjes emocionale që e karakterizon atë.

Manjola Baci
8 Shtator 2009

TIRANË - Të gjithë e kërkojmë lumturinë. Në mënyra nga më të ndryshmet. Të paktë janë ata që e gjejnë dhe kur e gjejnë zgjat pak kohë. Gjithsesi kjo nuk do te thotë se lumturia e ka ‘jetën e shkurtër’, përkundrazi, nëse arrijmë te krijojmë ekuilibrat tanë dhe nëse zbulojmë harmoninë me siguri ka për të qenë një beteje e fituar.

Shkencëtarët thonë se të qënit i lumtur është relative tek individi të ndryshëm. Kjo në varësi të përjetimeve dhe gjendjes emocionale që e karakterizon atë. Lumturia vjen para së gjithash, në atë që ne përfaqësojmë, pra imazhin që kemi për veten dhe të tjerët.

Ajo shihet si një kompromis midis sakrificës për të ruajtur një ekuilibër të drejtë, megjithëse kjo mundon individin për të qenë i lumtur. Një tjetër aspekt që mund të testojë lumturinë, është ndërmarrja aktive në jetën sociale që siguron marrëdhënie të tilla si; të ardhurat, besimi, lloji i punës, statusi social, pra këto drejtime konsiderohen si pikënisje të lumturisë.

Ajo çfarë ne shprehim në mimikën e fytyrës, nxjerr në pah gjendjen tonë shpirtërore. Për të qenë në harmoni me të përditshmen tonë, duhet të investojmë vazhdimisht për të rritur mirëqenien dhe pasqyruar denjësisht personalitetin tonë. Të përpiqemi të duam edhe gjërat më të vogla, të përfshihemi dhe të bëjmë më të mirën të mundshme për të përfituar ato synime që ndërmarrim.

Çmimi që i afrohet për të gjetur lumturinë nuk është ‘i shtrenjtë’. Ajo arrihet në mjaft mënyra ashtu siç i zgjedh individi psh: dikush kërkon qetësinë, një tjetër gjallërinë, secili e quan në gjuhën e tij. Kur flitet mbi lumturinë sugjerimet thuhen ne bazë të perceptimit dhe përjetimit emocional, që mbart njeriu nënvete. Kjo përçon tek individi kurbën, në të cilën vlerësohet dhe arrihet lumturia.







Lumturia është rruga më e shëndetshme për integrimin e njeriut si në familje e shoqëri. Të qenit fleksibël pranon dhe ofron mundësi bashkëveprimi të një jetese të mirë. Lumturia nuk është detyrë që dikush të thotë ‘bëje!’ ajo vjen natyrshëm dhe më pas kërkon që ta ruash dhe ta mbrosh.

Rëndësi ka që ne të kontribuojmë në gjërat që na bëjmë të rritemi me një eksperiencë që na ka dhënë fryte të mira. Megjithë këto mbiemra që ka lumturia a nuk ia vlen ta afrosh dhe ta prekësh? Prandaj jepni më të mirën dhe ruani vullnetin. //Autorja është studente në vitin e tretë, dega Psikologji//




Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 302 here