9/7/2009 6:36:58 PM

Tërmetet dhe pallatizimet

Nëse do të ishte edhe pak më e larta shkalla e tërmetit, me siguri që do të binte edhe më rëndë në ndërgjegjen tonë fatkeqësia dhe kambanat e qortimeve do të binin më fort në të gjithë veshët e përgjegjshëm.

TIRANË - E morëm edhe një leksion. Tërmeti që ra në vendin tonë ishte një paralajmërim alarmant për të githë ne qytetarët shqiptarë që të nisim e të mësojmë seriozisht se çfarë mund të na ndodhë kur toka dhe kapriçot e saj na sulmojnë për të na vënë në provë vetëdijen.

U befasuam kur e pamë njëri-tjetrin të tmerruar brenda pak sekondave sa nga njëri cep i shtëpisë në tjetrin. E më pas kërkonim të gjenim fajtorët, por më së pari lavdi Zotit që shpëtuam kokën.


Isidor Koti
Radiostinët, Drejtor
isidorkoti@hotmail.com
7 Shtator 2009

Nëse do të ishte edhe pak më e larta shkalla e tërmetit, me siguri që do të binte edhe më rëndë në ndërgjegjen tonë fatkeqësia dhe kambanat e qortimeve do të binin më fort në të gjithë veshët e përgjegjshëm.

Por ky nuk është një moment për të vënë me shpatulla pas murit ca njerëz që kanë përgjegjësinë, sepse ç’është bërë s’kthehet më. Është koha për të analizuar më seriozisht situatën e ndërtimeve pa kufi dhe rreziqeve që ato sjellin si rezultat i mungesës së studimit në një pjesë të mirë të tyre të kriterit gjeologjik.

Mania e fitimit i ka nxitur shqiptarët të ndërtojnë pallate me shumë kate në dy dekadat e fundit. Në këtë prirje, shumica e syve kurreshtarë nuk parashohin asgjë shqetësuese.

Banorët i gëzohen një apartamenti të ri, mirëpo nuk është kështu për specialistët e gjeologjisë, që shohin përtej peizazhit dhe bilancave ekonomike të çastit.

Trualli ynë është pushtuar nga ndërtimet me apo pa leje dhe sidomos nga pallatet me qindra banorë. Normalisht, ky shkrim nuk ka lidhje me problematikën e rreziqeve natyrore që u kanosen këtyre ndërtimeve, veçse me çështje të mënyrës së ndërtimit të tyre pa zbatuar ligjet e urbanistikës.

Për këtë shqetësim, pushtetarët, ndërtuesit madje edhe vetë banoret që i kanë bërë hesapet për harxhime të shumëfishta, kujtohen kur toka rrëshket dhe shtëpitë e tyre vidhisen tutje. Kështu ka ndodhur në shumë qytete të vendit dhe rastet janë të përsëritura. Është ngritur përherë i njëjti shqetësim dhe asnjëherë nuk është vënë dora ku dhemb plaga.







Ekspertët shprehen të alarmuar për sistemin e ndërtimeve dhe urbanizimin e zonave,që sipas tyre pas viteve ‘90, nuk janë kryer mbi bazën e hartave të rreziqeve sizmike dhe mikrozonimit sizmik. Mungesa e këtyre dy hartave është një alarm për ndërtimet në Shqipëri.

Ekspertët vlerësojnë se vendi ynë hyn tek terrenet me aktivitet të dendur sizmik. Shqipëria, së bashku me Turqinë, Greqinë dhe Italinë, gjithmonë janë prekur nga tërmete të fuqishme, e përpos këtyre në vazhdimësi toka jonë rregjistron lëkundje. Gjithsesi aktivitetet e nëntokës janë shumë të vështira për t’u parashikuar, e për pasojë nuk dihet se ku dhe kur mund të jetë lëkundja e radhës.

Pak kohë më parë sizmiologët shqiptarë lajmëruan se një tërmet i një shkalle mesatare mund të shkaktonte shumë dëme materiale dhe morale të banorët. Ata kanë bërë gjithmonë apel se pallatet po ndërtohen pa një studim nga inxhinierët gjeologjikë, për të vlerësuar numrin e kateve dhe lekundjet e tokës.

Mjaft pallate shumëkatësh janë ndërtuar pa studim gjeologjik të nëntokes, proces që në shumë vende është i detyrueshëm. Injorimi i kësaj procedure mund të sjellë pasoja të paparashikueshme në të ardhmen për shkak se shumë zona në vendin tonë qëndrojnë mbi pllakën transversale të zonës aktive sizmike.

Studimet sizmike kanë arritur në përfundimin se ky brez ndodhet në kapacitetin kufitar rezistues dhe që më pas shoqërohet me lëkundje sizmike që mund të arrijne deri në nëntë ballë. Sigurisht që në brendësi të tokës lëvizjet e materialeve shkëmbore akumulojnë deformime relative të shoqëruara me tensione (ndarje) të mëdha.

Tashmë është e nevojshme të bëhet mikrozonimi i qyteteve, për të përcaktuar më saktë kushtet gjeologo-inxhinierike dhe gjeoteknike të sheshit të ndërtimit si dhe klasifikimin e truallit me Kodin Shqiptar të Projektimit.



Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 565 here