8/18/2009 12:18:18 PM

Macaj, ja pse kërkoj dorëheqjen e Ministrit Nishani

Flet kreu i Sindikatës së Shërbimeve Policore të Shqipërisë, Valentin Macaj: ‘Një % e konsiderueshme e punonjësve të policisë jetojnë ne luks 'për shkak të detyrës'; pjesa tjetër është e mbytur ne borxhe dhe me zor mbyllin llogarinë e muajit.

Nga Doriana Metollari
drejtor@hermesnews.org
18 Gusht 2009

TIRANË - Operacioni për kapjen e Dajtit, ku mbeten të vrarë, katër punonjës policie, në një prej zonave të më frekuentuara të Durrësit, nuk do të harrohet lehtë.

Nuk është hera e pare që faqet e para të gazetave, mbushen me ngjarje te tilla, por duket sikur kjo e fundit nuk i është shtuar listës pa dashje.

Dritan Dajti, njeriu më i kërkuar i vitit, kishte një rrjet shumë të mirë informativ dhe kjo shpesh e kishte ndihmuar për t’ia dalë mbanë në tentativat për kapjen e tij.

Operacione të tilla zakonisht nuk merren vesh nga shumë njerëz, por kjo nuk është gjithçka për ruajtjen e sekretit. Vrasja e katër policisë, ndër më të mirët, u dha disa sinjale të ashpra krerëve të policisë dhe qeverisë shqiptare.

Mungesa e profesionalizmit, nuk është mburojë që mund te vihet sa herë që dështimet u dalin para syve. Dajti kishte ishte i lidhur me zyrtarë dhe mbante kontakti të vazhdueshëm me informatorët e vet të cilëve ashtu siç u premtoi mjekëve me siguri 'i ka larë me para'.

Por Dajti ishte vetëm një rast. Për sa tragjike dhe e turpshme kjo ngjarje, nuk ka për të arritur të nxjerrë të gjitha lidhjet e politikës me krimin. Çmimi që paguajnë ata, njerëzit e thjeshtë do të vazhdojë të jetë i lartë.

Valentin Macaj, Kreu i Sindikatës së Shërbimeve Policore para disa ditësh kërkoi dorëheqjen e Ministrit te Brendshëm Bujar Nishani, dhe pas kësaj Ministria e Drejtësisë në një deklaratë për shtyp, e shpalli atë 'një person të pushuar nga puna për parregullsi'.

Sipas Ministrisë, Konfederata e Shërbimeve Policore ‘..nuk përfaqëson interesat e punonjësve të Drejtorisë të Policisë së Burgjeve pasi në përbërje të saj nuk është anëtarësuar asnjë punonjës i kësaj Drejtorie dhe aq më tepër asnjë punonjës tjetër i administratës publike’. Sot Valentin Macaj, Kreu i sherbimeve policore te Shqiperise, në një intervistë eksluzive për Hermesnews flet për arsyet pse kërkoi dorëheqjen e Ministrit Nishani, dhe u përgjigjet deklaratave të Ministrisë..

Pas ngjarjes se vrasjes se katër policeve ju dolët me një deklarate për shtyp ku hodhët akuza te renda ndaj disa personave. A nuk ishte pak e nxitur kjo?

Jo. Reagimi ynë si sindikate është i natyrshëm pasi vriten në krye të detyrës katër oficerë, ajkë e policisë. Ngelen pa baba shume fëmije qe edhe pse qeveria u gjend ne krah te familjeve te tyre, prape nuk zëvendëson njeriun e tyre te dashur. Një i kërkuar te kryeje këtë masakër ne mes te një qendre te banuar, ku dendësia e banoreve është me e larta ne vend, pasi aty kemi te bëjmë me qindra pushues nga katër anët e kombit shqiptar dhe ne mes tyre strehohej njeriu me i kërkuar i vitit. Çdo pasoje ka një shkak dhe nëse ai shkak nuk është forcë madhore, më e pakta është gabim njerëzor. Dhe gabimi njerëzor ne këtë rast nuk mund te kërkohet askund tjetër përveçse tek personi juridikisht përgjegjës për operacionin.

Dmth, ju mendoni se vrasja e policëve ishte dhe gabim mënyrës sesi u organizua ky operacion..

Faktet tregojnë se po t'i jepej rëndësia e duhur planit operacional për kapjen e Dajtit, me siguri nuk do te përfundonte ne këtë bilanc tragjik. Dyshimet e prokurorisë tek 5 punonjës policie ne disa rrethe tregon se Dajti kishte ndërtuar një rrjet informimi te mirëfilltë. Me vone do te dalin edhe fakte te reja pasi ky person ka qene disa here jashtë vendit dhe sigurisht qe është pajisur edhe me pasaporte e vize përkatëse.

Pse keni kërkuar dorëheqjen e Ministrit te Brendshëm?

Kjo kërkesë është krejt normale pasi ka te beje jo vetëm me këtë bilanc tragjik ne humbjen e 4 oficereve por edhe ne masakrën e përditshme qe po ndodh ne rrugët e Shqipërisë. Shembull kemi rastin e ministrit kroat te transporteve i cili për një aksident ne hekurudhe dha dorëheqjen e menjëhershme. Kemi shembullin e ministrit te drejtësisë Ilir Rusmajli i cili vetëm për te lënë drejtësinë të vepronte dha dorëheqjen edhe pse ishim te bindur se nuk kishte faj. Kemi rastin e Fatmir Mediut që ditën e dyte te incidentit ne Gërdec dha dorëheqjen. Kemi rastin e Luan Rames që për shkak të incidenti me një gazetar dha dorëheqjen kur ishte Ministër i Brendshëm. Pse Nishani duhet te përjashtohet nga gjesti demokratik i dorëheqjes?

E keni pyetur atë?

Po, por ende nuk kam marrë përgjigje..

Atëherë të flasim për kushtet ku punon sot policia shqiptare..

Duhet thënë se Qeveria Berisha ka bere përparim ne rritjen e pagës here pas here për te gjithë shërbimet policore. Është ndryshuar ligji si për policinë e shtetit ashtu edhe për policinë e burgjeve. Ligji për trajtimin suplementar tani përfshin të gjitha shërbimet e policisë që operojnë në vend dhe pse ka një qejfmbetje nga ana e sindikatës e policisë se shtetit ku krerë te saj duke qene se janë ne prag pensioni mendojnë vetëm për te rikthyer ligjin e mëparshëm i cili u jep atyre (theksoj vetëm oficereve) pensione te majme ndërsa policeve te thjeshte vetëm sa për te mbajtur frymën gjalle.

Policia e shtetit ka kushte me te mira se policia e burgjeve si ne trajtim ne veshmbathje ashtu edhe ne trajtim page e ushqimi por prape nuk është arritur aty ku duhet dhe ne një linje me inflacionin aktual.

Ne policinë e burgjeve akoma mungojnë uniformat, nuk është marre shtesa e pagës qe ne Maj-2009, orët suplementare, orët shtese dhe ditët e festave. Ne disa burgje mungon transporti i punonjësve te policisë se burgjeve. E kam theksuar se që nga viti 2000 e këtej janë vetëvrarë mbi 15 punonjës policie burgjesh si pasojë e stresit dhe mbingarkesës në pune duke shtuar edhe kequshqyerjen e tyre, pagën e ulet, etj.

Nga një sondazh i kryer nga periudhën e plazhit Qershor-Shtator 2008 del se vetëm 13% e punonjësve te policisë se burgjeve kane mundur te kryejnë pushime normale me familjen tyre. 70% e punonjësve te policisë se burgjeve janë kredimarrës nëpër banka dhe se një pjese e vogël e tyre janë korrekt me këstet mujore bankare.

Sa paguhen sot këta punonjës policie që përballen çdo dite me krimin?

Paga mesatare e një punonjësi te policisë si te shtetit ashtu edhe te burgjeve llogaritet sipas gradës pasi vjetërsia është shkrire ne grade. Paga mesatare e punonjësit te policisë se shtetit është 29.000 leke pa llogaritur orët shtese, trajtimin ushqimor, ditët e gatishmërisë apo edhe shpërblimet përkatëse qe marrin periodikisht gjate vitit. Mund te shkoje mesatarisht deri ne 33.000 leke ne muaj page.

Situate tjetër është ne burgje ku deri me tani nuk merren orët shtese, orët e natës, shtesat sipas VKM te qeverise si p.sh. shtesa e fundit e Majit me 7%. Nuk marrin trajtimin ushqimor.

Paga mesatare e një punonjësi policie ne burgje është 27.000 leke. Nëse merren shtesat dhe shpërblimet apo orët e natës arrin deri ne 32.000 leke. Theksojmë "nëse".... pasi u bene vite qe nuk i përfitojnë.

Për çfarë tjetër ka nevoje Policia e Shtetit?

Ne mendojmë se policia e shtetit duhet te reformohet, vetepastrohet, kualifikohet dhe ndërgjegjësohet për punën qe kryen dhe për përfitimin qe merr. Nuk mundet te mendosh qe te punosh ne polici është një trampolin per t’u pasuruar. Si mund te pasurohesh pa thyer Ligjin ?!!.
Faktet tregojnë se një % e konsiderueshme jetojnë ne luks "për shkak te detyrës" dhe pjesa tjetër e punonjësve te policisë është mbytur ne borxhe apo me zor mbyllin llogarinë e muajit pa menduar për salltanete te tjera familjare. Një koleg ka 5-6 numra me kontrate ndërsa te tjerët me zor paguajnë faturën e numrave 41 te punës. Për mendimin tone duhet lufte pa kompromis kundër korrupsionit brenda radhëve te policisë, atëherë nuk kemi rrjedhje informacioni apo bashkëpunim me te kërkuarit. Kështu rritet besimi i qytetarit ndaj policisë dhe shtetit është me i forte kundër krimit.

Z. Macaj ju folët deri tani dhe preket në një farë mënyrë korrupsionin, lidhjet me krimin, kushtet e veshtia ku punoje policet tanë.. Ju besoni se jeni i legjitimuar për te përfaqësuar Sindikaten qe hedh këto akuza?

Ndaj deklaratave të Ministrisë së Drejtësisë, për këtë sulm të paprecedent për demokracinë dhe fjalën e lirë, sindikata jone reagon njëzëri duke thënë se ne jemi një Sindikate e pavarur e krijuar konform legjislacionit shqiptar me anëtarësi nga policia e punësuar dhe jo e larguar nga puna për asnjë lloj motivi. Sindikata e policisë nuk ka nevoje te ketë ne te anëtare te Drejtorisë se Policisë sepse kështu nuk do te ishte sindikate dhe nuk ka ne te persona te larguar nga puna sepse kështu do te quhej “shoqate” dhe jo “sindikate”. Koncepte te tilla është turp te ngatërrohen nga Ministria e Drejtësisë.


Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email | Stampo artikullin | Artikulli është lexuar 352 here