6/28/2009 8:52:40 AM

Fillon procesi i votimit

Lajmet minutë pas minutë/ Nesër do të publikohet vlerësimi paraparak i cili do të bazohet në informacionet e 400 vëzhguesve te ODIHR.

28 Qershor 2009
info@hermesnews.org


(07:30) - ''Të ndershme'', - i ka cilesuar agjencia britanike e lajmeve, Reuters, zgjedhjet ne Shqiperi. Kryeministri Sali Berisha dhe Partia e tij Demokratike u përballën me opozitën socialiste, të kryesuar nga Edi Rama, njëkohësisht kryetar i Bashkisë së Tiranës, në zgjedhjet parlamentare që vlerësohen nga Perëndimi si prova kryesore e gatishmërisë së Shqipërisë për integrimin në Bashkimin Evropian.

(07:00) - 'Shqiptarët votuan në një proces të qetë zgjedhor', - ka komentuar sot agjencia franceze e lajmeve, AFP.Afro 3,1 milionë votues ishin regjistruar për të marrë pjesë në zgjedhjet parlamentare, që konsiderohen si vendimtare për të ardhmen evropiane të vendit ballkanik.

(06:00) - Procesi i numërimit të votave ka vazhduar përgjatë orëve të natës. Procesi nisi pas dorëzimit të kutive të votimit në KZAZ dhe trajnimit të anëtarëve të grupeve të numërimit të votave, në përbërje të të cilëve janë përfaqësues të subjekteve të ndryshme politike. Në të gjithë vendin u ngritën mbi 4750 qendra votimi, ndërsa procesi po administrohet nga 66 komisione zonalë të administrimit zgjedhor.

(05:46) - Policia e Shtetit, përmes një deklarate për mediat, publikoi në orët e para të ditës së hënë, ecurinë e transportimit dhe dorëzimit të materialeve zgjedhore në vendet e numërimit të votave. Deri në orën 00.30 të ditës së sotme, Policia e Shtetit ka dorëzuar në Vendet e Numërimit të Votave 4373 kuti votimi, së bashku me materialet e tjera zgjedhore, ndërkohë që priten të dorëzohen nga çasti në çast edhe 379 kuti votimi.

(04:54) - Zëdhënësi i Komisionit Qendror të Zgjedhjeve, Leonard Olli tha, se ka filluar procesi i numërimit të votave në 24 vende numërimi nga 66 Komisione Zonale të Administrimit të Zgjedhjeve. Zëdhënësi i KQZ-së u shpreh se "procedura e marrjes në dorëzim të bazës materiale po ecën mjaft mirë deri në këto momente".

(03:00) Koalicioni i Vëzhguesve Vendorë (KVV) raportoi dje ne darke se pjesëmarrja e zgjedhësve në votimet e 28 qershorit, në të 12 qarqet e vendit ishte 52%. Sipas tyre, në qarkun e Beratit pjesëmarrja në votime ishte 44%, në Dibër 62%, në Durrës 47%, Elbasan 51%, në Fier 53%, në Gjirokastër 49%, në Korçë 52%, në Kukës 49%, në Lezhë 50%, në Shkodër 50%, në Tiranë 53% dhe në qarkun Vlorë 45%.

(02:00) Elbasan/ Ne orën 00.40 të mëngjesit të sotëm ka nisur në rrethet e Elbasanit, Librazhdit, Cerrikut Peqinit dhe pritet që brenda 30 minutave të nisë edhe në rrethin e Gramshit, proçesi i numërimit të votave në pesë KZAZ-të e qarkut të Elbasanit. Aktualisht në KZAZ nr. 12, në Pallatin e Sportit “Tomorr Sinani”, sapo ka mbaruar verifikimi i dy kutive të materialeve, dhe tashmë ka nisur numërimi i votave. Për zgjedhjet e përgjithshme të 28 qershorit në qarkun e Elbasanit ishin rregjistruar 299.663 zgjedhës, në 549 qendra votimi.

(18:35) Tepelene/ Ngjarje te dhunshme kanë shoqëruar përgjatë ditës së sotme procesin zgjedhor në rrethin e Tepelenës. Kandidati për deputet i PS Ethem Ruka, denoncon dhunën e ushtruar ndaj një komisioneri socialist të qendrës së votimit në fshatin Rexhin të Komunës Kurvelesh në rrethin e Tepelenës. Sipas selise se PS, Komisioneri i PS Julijan Balilaj ishte qëlluar nga shtetasi Jaho Xhebro i cili sipas të dhënave të grumbulluara ka ushtruar dhunë në ambjentet e brendshme të Qendrës së Votimit të këtij fshati në prani të anëtarëve të tjerë të komisionit. Dhuna e ushtruar ndaj komisionerit socialist Juljan Balilaj ka ardhur pasi ky i fundit nuk ka lejuar të votojë të jatin e shtetasit Jaho Xhebro i cili sipas komisionerit socialist, nuk kishte asnjë lloj mjeti identifikimi si letërnjoftim apo pasaportë.

(18:20) Kastriot Islami ka denoncuar sot një rast flagrant manipulimi. Sipas tij një person ka votuar për një tjetër. Bëhet fjalë për shtetasen Erjola Dervishi e cila u paraqit për të votuar në qendrën e saj të votimit në shkollën 'Sami Frashëri' por u kthye mbrapsht nga komisioni pasi një person tjetër kishte votuar më parë për të.

(18:10) Kreu i Komisionit Qendror të Zgjedhjeve, Arben Ristani doli në një konferencë për shtyp para gazetarëve në të cilën njoftoi për pjesmarrjen e deritanishme në zgjedhje. Ristani bëri një pasqyrë të zgjedhjeve duke thene se procesi ishte ndërprerë vetëm në 3 qendra votimi, ku shkak ishte bërë largimi i komisionerëve. Ai deklaroi se nëse në Qendrat e Votimit do të ketë radhë pas orës 19.00, atëherë QV do të vazhdojnë të jenë të hapura. Pjesëmarrja deri në orën 16.00: Berati 45%; Dibra 42 %; Fier 45 %; Lezha 39 %; Shkodra 41 %; Tirana 41 %.

(17: 58) Diber/ Kandidati për deputet i Partisë Demokratike të Shqipërisë në Qarkun e Dibrës, Jemin Gjana e vlerësoi mjaft pozitive ecurinë e deritanishme te proçesit të votimeve. Sipas tij: "deri në orën 16.10 shkalla e pjesëmarrjes në votime në të gjithë Qarkun Dibër ka arritur në 45 për qind, por interesimi vazhdon të jetë në rritje, kjo e favorizuar dhe nga përmirësimi i kushteve atmosferike, pas pushimit të rreshjeve të shiut, gjë që pritet të shoqërohet me shifra të larta, të numrit të votuesve".

(17:38)- Mbi 33% e zgjedhësve të rregjistruar në 350 qendrat e votimit në Qarkun e Durrësit kanë votuar deri në orën 17.00 të ditës së sotme. Deri në orën 17.00 është mbi 33%. Fluksi më i madh i votuesve është vënë re nga ora 11.00-13.00. Sot në Qarkun e Durrësit janë ftuar në zgjedhje afro 290 mijë votues dhe nga ky proçes do të shpallen 13 deputetë.

(17:28) Tirane/ Kryetari i KQZ-së, Arben Ristani konfirmoi pak çaste më parë se procesi i votimit për zgjedhjet e përgjithshme po vijon normalisht. Sipas tij shifrat e pjesëmarrjes së deritanishme në votime për disa qarqe të vendit jane: deri në orën 14:30, pjesëmarrja në votime në qarkun Berat është 37%, në Dibër 39%, në Durrës 34%, Elbasan 37%, Fier 38%, Gjirokastër 34%, Vlorë 33%, Kukës 41% (më e larta), në Lezhë 34%, në Shkodër 35% dhe Tiranë 38%.

(17:09) Deri në orën 16.30, në 284 qëndrat e votimit në prefekturën e qarkut të Gjirokastrës kanë votuar mbi 45% e zgjedhësve. Arjan Gjini, përfaqësuesi i Komisionit Qendror të Zgjedhjeve për Gjirokastrën, ka pohuar ditën e diel se në orët e para të mbasdites është vënë re një rritje e numrit të shtetasve që dëshirojnë të votojnë pranë qendrave të votimit.

(17:01) Shkoder/ Procesi i votimit gjatë ditës së sotme në qytetin e Shkodrës është i qetë. Nënkryetarja e Partisë Demokratike, Jozefina Topalli tha se: "Deri në orën 15.00, ka patur një pjesëmarrje rekord të votuesve në Bashkinë e Shkodës, që është më e lartë se në vitin 2005. E njëjta gjë, në 15.30, është dhe për komunat më të mëdha të këtij rrethi, si në Komunën e Rrethinave, e Anës së Malit, etj".

(16:50) Kurbin/ Mbi 50 % e zgjedhësve në nënprefekturën e Kurbinit, në Qarkun e Lezhës, kanë votuar deri tani.
Procesi vazhdon normalisht, ndërkohë që pjesëmarrja e zgjedhësve në këtë qark mendohet që deri në fund të procesit të arrijë mbi 70 %.

(16:40) Tropojë/ Deri në orën 15.30, në 76 qëndrat e votimit të rrethit të Tropojës kanë votuar mbi 52% e zgjedhësve.
Sipas Kryetarit te KZAZ, Avni Ahmetaj: ''deri tani situata ka qënë normale dhe nuk është shënuar asnjë incident.'' Në këtë rreth në 76 qëndrat e votimit janë thirrur për të votuar 20.137 shtetas.

(16:35) Kukes/ - Në 100 zona zgjedhore të rrethit të Kukësit kanë votuar rreth 50% e zgjedhësve. Sipas Nënkryetarit te KZAZ, Ylber Duraku; ''Procesi zgjedhor ka vijuar normalisht pa patur ndonjë problem. Eshtë zgjidhur edhe problemi i shfaqur në orët e para të mëngjezit në një qëndër votimi të komunës Ujmishtit, në fshatin Orgjos.'' Edhe drejtuesit lokale të dy forcave kryesore politike, PD e PS, dëshmojnë për situatën normale zgjedhore në rrethin e Kukesit.

(16:33) Berat/ Përfaqësuesi i LSI-së në Berat, Vasil Naço, tha se; “proçesi zgjedhor në këtë qark po ecën normalisht Pjesëmarrja në Skarpar është 50%, në Kuçovë dhe në Berat është tek 30-35%”. ”

(16:14) Partia Socialiste, aktualisht partia me e madhe opozitare ne Shqiperi, ka vene ne dispozicion nje numër telefoni (044801050) ku qytetaret mund te denoncojne çdo presion e kërcënim.

''Duke vërejtur se ka kudo qytetarë që nuk gjejnë emrin në qendrën e votimit, Partia Socialiste vë në dispozicion numrin e telefonik ku bëhet direkt verifikimi i listës dhe jepet vendndodhja e saktë e qendrës së votimit'', - shkruhet ne faqen zyrtare te kesaj partie

(16:00) Berat/ Përfaqësuesi i LSI-së në Berat, Vasil Naço, u shprej i kenaqur per ecurine e procesit zgjedhor. "Pjesëmarrja në Skarpar është 50%, në Kuçovë dhe në Berat është tek 30-35%”.

(15:59) Vlore/ Nënkryetari i Partisë Demokratike të Shqipërisë dhe njëkohësisht kandidat për deputet i kësaj force politike në Qarkun e Vlorës, Astrit Patozi, e vlerësoi mjaft pozitive ecurinë e deritanishme te procesit të votimeve. Sipas tij deri ne oren 15.10, shkalla e pjesëmarrjes në votime në të gjithë Qarkun ka arritur në 33-34%.

(15:57) Kryeministri Sali Berisha tha se numri i pjesmarresve ne votime deri tani ka arritur ne 40%.

(15:30) Sarandë/ Një delegacion i OSBE-ODHIR, i kryesuar nga Wolfgang Grossruck, zv. president i asamblesë së Përgjithshme të OSBE dhe koordinator special për zgjedhjet parlamentare 2009 në Shqipëri, vizitoi sot disa qendra votimi dhe më pas u takua me kryetarin e Bashkisë së Sarandës, Edmond Gjjoka. OSBE, ODHIR vizituan qendrën e aplikimit për letërnjoftimet. Ne kete qender nga 10 mijë aplikantë, vetëm 300 letërnjoftime kanë mbetur pa tërhequr dhe nga ora në orë, paraqiten emigrantë që i marrin dhe j'u drejtohen qendrave të votimit.

(15:15) Tirane/ Partia Socialiste ka ripërsëritur apelin e saj për një votim masiv të shqiptarëve për të zgjedhur alternativën e tyre më të mirë, në zgjedhjet e sotme parlamentare . Sekretari për Çështjet Ligjore në Partinë Socialiste, Kastriot Islami tha: “Partia Socialiste është në vëzhgim të plotë për të mbrojtur votat e shqiptarëve, nga çdo manipulim i mundshëm në të gjithë territorin e vendit”.

(15:14) Tirane/ Zëvendëskryetari i LSI-së, Pëllumb Xhufi shprehu shqetësimin e tij për fenomenin e votimit familjar: “fenomeni i votimit familjar është vënë re sa në Dibër, aq edhe në Shkodër, por edhe në Tiranë, e në Kodër Kamëz, ku grupe njerëzish kanë votuar së bashku”. Ai tha se është shqetësuese edhe praninë e grupeve militante në ambientet e qendrave të votimit. “

(15:09) Shkoder/ Kreu i Bashkisë së Shkodrës, Lorenc Luka, njëkohësisht kryetar i shtabit elektoral të këtij qyteti, ka reaguar per problemet e shkaktuara në qëndrën e votimit numër 26. Në këtë qendër (pranë Fakultetit të Shkencave të Natyrës), u pezullua për pak kohë procesi i votimit. "Kandidatët për deputetë të PS-së në Qarkun e Shkodrës Tom Doshi dhe Ilir Beqja, janë bërë pengesë për ecurinë normale të procesit zgjedhor" tha Luka.

(15:00) Tirane/ Presidenti i Republikës, Bamir Topi i bëri sot thirrje partive politike që "të jenë shumë të vëmendshme dhe të japin mesazhe për ecurinë korrekte dhe transparente të zgjedhjeve".

(14:50) Fier/ Kryetari i Komunës Topojë, në rrethin e Fierit, Sotir Zarka, ka denoncuar në Drejtorinë e Policisë së Qarkut Fier shtetasin Alfred Davidhi banues në fshatin Topojë militant i Partisë Socialiste, pasi ky i fundit ka ushtruar dhunë fizike ndaj tij. Zarka përfaqëson si kryekomunar, subjektin politik LSI.

(14:30) - Komisioni Qendror i Zgjedhjeve (KQZ) miratoi të dielën në parim dhe nen për nen vendimin për ndalimin gjatë procesit të votimit nga anëtarët e komisioneve të qendrave të votimit (KQV), të mjeteve të tjera, përveç atyre të parashikuara në Kodin Zgjedhor. "Gjatë procesit të votimit anëtarët e KQV-ve në asnjë rast të mos përdorin procedurë dhe mjete te tjera përveç materialeve zgjedhore që janë marrë në dorëzim sipas nenit 100 të Kodit Zgjedhor nga KZAZ-të përkatëse. Në rast se ndonjë nga anëtarët apo sekretari i QV-së të përdorin mjete të tjera që nuk janë të përcaktuara në ligj, atëhere kryetari i QV-së mban procesverbal dhe njofton menjëherë KZAZ-në përkatëse dhe KQZ-në", u tha ne vendimin i miratuar mesditën e sotme nga komisioni zgjedhor.

(14:09) Vlore/ Policia e Vlorës deklaroi pak minuta më parë në një konferencë për shtyp se atmosfera e zgjedhjeve në të gjithë territorin e Qarkut të Vlorës, është e qetë. Zëdhënësi i Drejtoisë së Policisë së Qarkut të Vlorës, Saimir Koçiaj, u shpreh se, “deri në këto momente, në të gjithë Qarkun nuk është rregjistruar asnjë incident”.
Në këtë proces, pritet te votojne, 187428 zgjedhës, të shpërndarë në 13 bashkitë dhe komunat e këtij rrethi, ku funksionojnë 3 KZAZ, të ndara në 3 zona zgjedhore me numër 61, 62 dhe 63, me gjithsej 208 qendra votimi.

(14:00) - Ambasadori i OSBE-së në Tiranë, Robert Bosch tha sot para mediave se: "nga raportimet e deritanishme situata zgjedhore në Shqipëri është relativisht e qetë kudo".

(13:45) Vlore/ Shkalla e pjesëmarrjes së zgjedhësve në votimet e sotme, në disa zona të qarkut të Vlorës, është e kënaqshme. Prefekti i këtij qarku, Hasan Halili, tha se në zona të veçanta, sikundër në ato që përfshihen në territorin e administruar nga komunat Qendër dhe Novoselë, pjesëmarrja në votime ka arritur në rreth 30%. Në këtë proces, janë ftuar të marrin pjesë 187428 zgjedhës, të shpërndarë në 13 bashkitë dhe komunat e këtij rrethi, ku funksionojnë 3 KZAZ, të ndara në 3 zona zgjedhore me numër 61, 62 dhe 63, me gjithsej 208 qendra votimi.

(13:35) - Drejtori ODIHR, Janez Lenarcic gjatë inspektimit sot në mesditë të qendrës së votimit në shkollën "Hasan Prishtina" në kryeqytet, vuri theksin në rëndësinë e zgjedhjeve parlamentare, për të ardhmen e Shqipërisë. "Ajo cfare është e rëndësishme është një pamje e përgjithshme dhe jo nga një apo dy vëzhgues", - u shpreh Lenarcic. Nesër do të publikohet vlerësimi paraparak i cili do të bazohet në informacionet e 400 vëzhguesve.

(13:13) Presidenti i Republikës, Bamir Topi, Ambasadori i SHBA-së, John L. Withers dhe Ambasadori i OSBE-së në Tiranë, Robert Bosch zhvilluan sot një takim informal në ambientet e Kompleksit "Taivan", në qendër të kryeqytetit, ku diskutuan për situatën zgjedhore në vend. Ambasadori Withers theksoi se "çdo njeri që ka të drejtën e votës duhet të ushtrojë këtë të drejtë demokratike dhe të dalë të votojë sot".

(13:00) Tirane/ Ambasadori i SHBA-së, John L. Withers deklaroi sot se: " eshte shumë e rëndësishme për të gjitha partitë dhe subjektet pjesëmarrëse në këto zgjedhje, që të respektohet ligji dhe procedurat për të cilat është rënë dakord më parë, si dhe të zbatohen standardet ndërkombëtare".

(12:56) Ministri i Transporteve, Sokol Olldashi, njëkohësisht dhe kandidat për deputet i Partisë Demokratike në qarkun e Fierit, ka kërkuar zbatimin e kodit zgjedhor në lidhje me mos lejimin e stilolapsave me mikrokamera në qëndrat e votimit. “kodi e përcakton në mënyrë specifike se cilat janë mjetet që mund të përdoren në një qëndër votimi dhe kjo në fakt duhet parë sepse në të vërtetë përbën një vepër penale që mund të klasifikohet si përgjim i paligjshëm. Nje votim normal dhe të qetë si dhe për një pjesmarrje të kënaqshme në votime". Ai përmëndi edhe për incidente në dy zona në qarkun e Fierit ku sipas Olldashit, komisionerëve të Partisë Socialiste në komunën e Libofshës u janë sekuestruar disa stilolapsa me mikrokamera.

(12:54) Një vëzhgues i Partisë Socialiste, në Qendrën e Votimit Nr.1862, pranë shkollës “Shyqyri Peza” në Kombinat, është larguar pasi mbante sende të palejuara. "Sot në mëngjes nga Komisioni i kësaj Qendre Votimi është kërkuar ndërhyrja e shërbimeve të policisë për largimin e shtetasit Mihal Xhaka, vëzhgues i Subjektit Politik Partia Socialiste, i cili sipas KQV-se mbante sende të pa lejuara në Qendrën e Votimit, " - njoftoi policia e Tiranës.

(12:53) Elbasan/ Pajisja e disa komisionerëve të PS në qendrat e votimit në qytetin e Elbasanit me materiale që nuk janë të firmosura nga KQZ, ka shkaktuar debate mes komisionerëve. Në qendrën e votimit nr 23/62 në mjediset e shkollës "Sali Çeka" është konstatuar se komisioneri i PS-së, Perikli Lami ishte i pajisur me një stilolaps të zi me USB. Sipas sekretarit të komisionit të qendrës, Naim Vasku, ai kishte të instaluar edhe kamer të fshehtë për të vëzhguar proçesin zgjedhor. "Nuk është e ligjshme sipas Kodit Zgjedhor që komisionerët të kenë materiale shtesë nga ato që ndodhen brenda kutisë së materialeve zgjedhore me proçes verbal”, tha Vasku.

(12:52)Anëtarja e kryesisë së Partisë Socialiste, Lindita Nikolla ka kërkuar verifikimin e kartave të idenitetit. “Kërkojmë verifikimin e kartave të identitetit duke mundësuar që çdo kartë e pavlefshme të mos jetë pjesmarrëse në një proçes të manipuluar. ”- tha Nikolla.

(12:50) Durres/ Kandidati për deputet i Partisë Demokratike për qarkun e Durrësit, Gazmend Oketa, lidhur me denoncimin që PD i ka bërë opozitës për kontrollin e paligjshëm të proçesit zgjedhor, Oketa tha se raste të tilla kishte patur edhe në disa qendra votimi në Shijak, ku ndonjë votues ka fiksuar votën e tij përmes stilolapsave me kamera të shpërndara nga anëtarë të PS. “Është një gjë krejt e panevojshme", nënvizoi Oketa.

(12:49) Partia Lëvizja Socialiste për Integrim (LSI) përmes një deklarate për shtyp shprehu shqetësimin e saj për disa parregullsi gjatë procesit të votimit. “Disa qëndra votimi në mbarë vendin ende nuk janë hapur për shkak të parregullsive që kanë të bëjnë me listat e komisionerëve apo me moskorrespondimin e vulave me numrin e qëndrës përkatëse të votimit. Shqetësim përbën edhe cilësia e bojës së votimit dhe fotografimi të fletëve të votimit”, deklaroi zyra për shtyp e LSI-se.

(12:47) Sipas policisë së shtetit, procesi i ruajtjes dhe më pas dorëzimit të Komisioneve Zonale të Administrimit të Zgjedhjeve, (KZAZ) dhe Qendrave të Votimit, nuk ka patur asnjë problem.
Sot rreth orës 06 .00 filloi dorëzimi i këtyre qëndrave nga ana e policisë tek Komisionet e qëndrave të votimit. Policia e Shtetit tha se, dorëzimi kishte përfunduar rreth orës 08.00, pothuajse në të gjitha qaret pa asnjë problem.

(12:45) Genc Ruli, kandidati për deputet i Partisë Demokratike për qarkun e Gjirokastrës, tha se: "deri tani proçesi zgjedhor në qarkun e Gjirokastrës po vazhdon normalisht. Nga informacionet e marra prej mëngjesit të sotëm e deri tani, në qarkun Gjirokastrës, përjashto fshatin Mezhgoran, të gjitha qendrat e votimit janë funksionale që prej orëve të para të mengjesit dhe përqindja më e lartë e votuesve shënohet në fshatrat që kanë më shumë emigrantë".
Në fshatin Mezhgoran janë 220 votues që nuk kanë nisur ende proçesin e votimit.

(12: 43) New York/ Federata Panshqiptare “Vatra” në një deklaratë për shtyp bën thirrje të gjithë shqiptarëve me të drejtë vote që të marrin pjesë masivisht në këto zgjedhje dhe me dinjitet e ndjenjë të lartë qytetarie të mbështesin ecjen e sigurt të Shqipërisë drejt përparimit dhe integrimit të plotë të vendit.

(12:42) Kakavijë/ Në lidhje me fluksin në pikat e kalimit të kontrollit kufitar në Kakavije, Sopik dhe Çarshovë, kemi këtë policia e Gjirokastrës bëri të ditur se, gjatë 24 orëve të datës 27.06.2009 , kanë hyrë 7905 shtetas dhe 1902 automjete. Gjatë orëve të para të mëngjezit të datës 28.06.2009, kanë hyrë 2570 shtetas dhe 293 automjete si dhe 44 autobuzë. Nuk ka fluks në këto momente dhe lëvizja është normale si në hyrje dhe në dalje.

(12:40) Gjirokastër/ Zedhenesi i Policise se Gjirokastres beri te ditur se: ''Në qarkun e Gjirokastrës jane 288 qëndra votimi, ku 119 janë në rrethin e Gjirokastrës, 88 në rrethin e Tepelenës dhe 81 në rrethin e Përmetit.'' Sipas tij, gjithsej janë 294 objekte zgjedhore të cilat që prej orës 20.00 të datës 27.06,2009, janë marrë nën ruajtie nga policia. Gjatë natës nuk ka pasur asnjë problem dhe rreth orës 06 .00 të datës 28.06.2009 , ka filluar dorëzimi i këtyre qëndrave nga ana e policisë tek Komisionet e qëndrave të votimit. Një qendër votimi në fshatin Mezhgoran të Komunës Qëndër Tepelenë, nuk ka filluar votimi, pasi nuk kanë tërhequr fare materialet e votimit.

(12:38) Tirane/ Përfaqësuesi i PS-së, Genci Gjonçaj denoncoi faktin se në njësinë kashkiake nr. 7 në kryeqytet, kishin ardhur persona në cilësinë e përfaqësuesit të KQZ-së dhe i janë imponuar stafit të kësaj njësie. Ai tha gjithashtu se, ne KZAZ nr 61, kishte humbur nje vule, te cilen KQZ e zëvendësoi duke e dërguar atje me një helikopter të Ministrisë së Brendshme.

(12:30) Përfaqësuesi i PD-së në KQZ Njazi Kosovrasti beri te ditur se përfaqësuesit e PS-së po kontrollonin me llampa ultraviolet kartat e identitetit dhe gishtat e votuesve në qendrat votimi. Veprimi u kundërshtua nga kryetari i KQZ-së, Arben Ristani duke thënë se nuk e përmban kodi zgjedhor.

(12:14) Kandidatja për deputete e Partisë Demokratike për Qarkun e Tiranës, Lajla Përnaska nenvizoi përpjekjet e Partisë Socialiste për të kontrolluar dhe manipuluar procesin zgjedhor.
Gjatë një prononcimi Përnaska vuri në dukje se: "kryetarët, zv.kryetarët dhe komisionerët e PS-së janë kapur në disa raste me stilolapsa me kamera, si në Shijak ashtu edhe në Tiranë, në qendrat e votimit të vendosura te Shkolla e Baletit, në kryeqytet. Kjo është e kundraligjshme dhe është një nga elementët që mund të cënojë procesin zgjedhor. Përdorimi i këtyre mjeteve brenda qendrave të votimit është totalisht e paligjshme".

(12:09) Peqin/ Procesi i votimit ka filluar dhe në Burgun e Sigurisë së Lartë të Peqinit, në orën 07.00 të mëngjesit.
754 të dënuar do të votojnë për zgjedhjet parlamentare. Qendrat e votimit jane brenda te gjitha standarteve dhe sipas Drejtorit te Burgut, Pajtim Nurja; “deri më tani kanë votuar 150 të dënuar dhe proçesi po vijon normalisht. Nga 754 të dënuar 77 prej tyre do të votojnë me vendim gjykate, 2 prej tyre nuk do të votojnë pasi njëri është shtetas turk dhe tjetri kosovar, ndërsa pjesa tjetër janë pajisur me karta identiteti".

(11:57) Tirane/ Presidenti Bamir Topi, i shoqëruar familja e tij, votoi sot rreth orës 11:15 në qendrën e votimit nr. 9, në mjediset e shkollës “Servete Maçi”, që përfshihet në mininbashkinë nr. 8, në Tiranë.“ Jam i bindur se të gjithë sot janë të fokusuar tek zgjedhjet e përgjithshne të 28 qershorit. Ashtu siç është thënë vazhdimisht këto zgjedhje janë të rëndësishme, pasi ato do t’i hapin rrugën vendit për në Bashkimin Evropian. U bëj thirrje partive politike dhe komisionerëve që të japin mesazhet e duhura në këtë ditë", -tha Presidenti Topi.

(11:25) Tirane/ Zëdhënësja e fushatës zgjedhore të PD, Majlinda Bregu u bëri thirrje qytetarëve shqiptarë që të shkojnë e të votojnë të qetë. Bregu kritikoi përdorimin nga PS të mjeteve të teknologjisë së lartë për të spiunuar votën, tha se: ''Edi Rama po kalon nga shkumësi i Saimir Tahirit tek stilolapsa me të cilët socialistët po dëshmojnë se janë diletantë në përdorimin e teknologjisë së re''.

11:20 Shkoder/ Sipas Drejtorise se Policië së Qarkut të Shkodrës "nuk është shënuar asnjë problem në procesin e votimit në rrethet e Shkodrës dhe të Malësisë së Madhe, si dhe në rrethin e Pukës".

(11:00) Shkoder/ Kryeministri Sali Berisha, njëkohësisht kryetar i Partisë Demokratike dhe bashkëshortja e tij, znj. Liri Berisha, votuan sot rreth orës 09:50 në qendrën e votimit nr.1728, e vendosur në mjediset e Liceut Artistik "Jordan Misja", që përfshihet në njësinë bashkiake nr. 2, në Tiranë.

Në interviste Berisha tha se:“Në këto zgjedhje të lira dhe të ndershme do të fitojë çdo shqiptar. Këto janë zgjedhje me të cilat shqiptarët firmosin projektin e tyre evropian”, theksoi Kreu i Qeverisë.










(10:42) Tirane/ Kryetari i PS-së, Edi Rama, votoi sot rreth ores 10:40, në qendrën e votimit numër 1902/, në mjediset e shkollës “Pjetër Budi” në kryeqytet. Per gazetaret ai tha se: “Një vendim të cilin populli sovran do ta thotë dhe unë jam shpresëplotë se populli do ta marrë brenda gjithë normalitetit politik dhe qetësisë që meriton. Normalitet dhe qetësi që duhet të jetë një garanci e dhënë nga të nga të gjitha forcat e rendit në territorin shqiptar, por edhe nga forca qytetare që ne kemi angazhuar, të vendosura për të nxjerrë në fund vendimin e paprekur, të pacënuar dhe të padeformuar të popullit”.

(10:35) Shkoder/ Në zgjedhjet e 28 qershorit konkurojnë 34 subjekte zgjedhore, 33 prej të cilave janë grupuar në katër koalicione, dy të spektrit të djathtë dhe dy të majtë.

(10:30) Shkoder/ Kryetarja e Kuvendit, Jozefina Topalli, e shoqëruar nga familjrët e saj ka votuar sot rreth orës 9 e 30 në qendrën e votimit numër 107, në Fakultetin e Gjuhëve të Huaja në Universitetin “Luigj Gurakuqi” në Shkodër. "Unë shpresoj se qytetarët do të shkojnë në kutitë e votimit për të ushtruar të drejtën e tyre, për të vendosur për atë që do të jetë e ardhmja e fëmijëve të tyre, për atë që do të jetë e ardhmja europiane e Shqipërisë" tha Topalline nje prononcim per mediat.

(10:21) Lushnje/ Në rrethin e Lushnjës janë ngritur 3 qëndra numërimi të votave, 1 për qytetin dhe 2 për komunat si dhe 1 qëndër për numërimin e votave në rrethin e Mallakastrës.

(10:16) Fier/ Procesi zgjedhor në qarkun e Fierit ka filluar në orën 07.00. Sipas burimeve, situata eshte e qete. Pritet që 352.340 votues të votojnë në 488 qëndra votimi.

(10:15) Librazhd/ Në bashkinë e Librazhdit do të votojnë 51.170 zgjedhës në 90 qendra votimi. Në Bashkinë e Cerrikut do të votojnë 52.905 zgjedhës në 90 qendra votimi. Në komunën Bradashesh do të votojnë 52.781 zgjedhës në 123 qendra votimi. Në Bashkinë Gramsh do të votojnë 25.077 zgjedhës në 97 qendra votimi dhe në bashkinë Peqin do të votojnë 26.185 zgjedhës në 53 qendra votimi. Vendnumërimet e votave për të 6 qendrat e KZAZ do të jenë në Elbasan, Cerrik, Gramsh, Librazhd, Peqin dhe Prrenjas.

(10:00) Elbasan/ Në orën 07.00 të mëngjesit, ka filluar zyrtarisht proçesi i votimit për zgjedhjet parlamentare në qarkun e Elbasanit, ku pritet të votojnë 299.663 shtetas në 549 qendra votimi të shpërndara në të gjithë territorin e qarkut. Në kete Bashki votojnë 91.545 zgjedhës në 96 qendra votimi.

(09:41) - Sipas Komisionit Qendror te Zgjedhjeve. Procesi i votimit për zgjedhjet elektorale në të gjithë vendin ka nisur dhe po ecën normalisht. Zedhenesi i KQZ, Leornard Olli tha se: ''Nga të dhënat e para të ardhura nga Komisionet Zonave Zgjedhorë në të gjithë vendin, por dhe nga sekretarët e komisioneve të qendrave të votimit, tregojnë se në të gjitha qendrat nuk ka pasur asnjë shqetësim, përsa i përket hapjes së qendrave të votimit.''

(09:40) - Korçe/ Në të 62 Qendrat e votimit në qytetin e Korçës ku pritet të votojnë 69.294 zgjedhës ka nisur normalisht procesi i votimit , në orën 07.00. Votimi në 62 qendrat e votimit të qytetit të Korçës ka filluar dhe po ecën normalisht.

(09:37) Shkodër/ Drejtoria e Policisë Qarkut Shkodër, bën te ditur se ka marrë të gjitha masat në lidhje me zbatimin e detyrave të tyre kushtetuese gjatë procesit zgjedhor të ditës së sotme. Sipas zëdhënëses Fatbardha Çelepia, mbrëmjen e djeshme në orën 20.00 Policisë Qarkut Shkodër, në Bashkëpunim dhe me KZAZ, ka marrë nën ruajtje materialet zgjedhore, në 426 Qëndra Votimi dhe 5 KZAZ.

(09:33) Gjirokastër/ Në qarkun e Gjirokastrës ka nisur qe në orën 07:00 të ditës së diel procesi zgjedhor në 284 qendra votimi. Në prefekturën e qarkut të Gjirokastrës pritet të votojnë 129.600 shtetas të regjistruar në listat përfundimtare të zgjedhësve.
Ne Gjirokaster, Tepelenë, Përmet janë hapur 284 qendra votimi, prej të cilave 122 në rrethin e Gjirokastrës, 87 në rrethin e Përmetit dhe 75 në Tepelenës.

(09:30) - Tirane/ Komisioni Qendror i Zgjedhjeve (KQZ) ka bere te ditur se procesi i votimit për zgjedhjet e përgjithshme po vijon normalisht në të 4750 qendrat e votimit të ngritura në të gjithë Shqipërinë.

(09:25) Has/ Në rrethin e Hasit votimi ka nisur në 21 qendrat e Votimit, ku do te votojnë 13.231 votues.

(09:21) Tropoje/ Në rrethin e Tropojës ka nisur normalisht votimi në 76 qendra votimi, ku do të votojnë 20.127 persona.

(09:13) - Kukës/ Në qarkun e Kukësit që në orën 07:00 sot ka nisur normalisht procesi zgjedhor në të gjitha qendrat e votimit. Pritet të votojnë 72.887 votues. Qendrat e votimit janë hapur në kohë dhe procesi zgjedhor ka nisur pa probleme. Qarku i Kukësit do të zgjedhe 4 deputetë gjithsej.

(09:11)Tiranë/ Kryetari i Lëvizjes Socialiste për Integrim votoi sot rreth orës 09:10 të ditës së sotme, në qendrën e votimit numër 1882 në njësinë bashkiake nr. 7, në Laprakë. “E pata shumë të lehtë ta gjeja numrin 24”, - tha Meta në një prononcim të shkurtër për gazetarët.

(09:10) Durrës/ Procesi nuk ka nisur ende vetëm në një qëndër votimi ne durres, ku ende nuk janë paraqitur komisionarët.

(09:07) Durrës/ Në Durrës procesi zgjedhor ka nisur sot që në orën 7.00. Procesi i zgjedhjeve të përgjithshme ka nisur në tërësi në 350 Qendrat e Votimit të ngritura në 6 bashki dhe 10 komunat e qarkut. Sot në Durrës janë ftuar në zgjedhje afro 290 mijë votues te cilët do te shpallin 13 deputetët përfaqësues të qarkut në Kuvendin e ardhshëm të Shqipërisë.

(09:01) - Misioni vëzhgues i ODIHR pritet të paraqesë raportin e parë paraprak mbi standardet e zgjedhjeve.

(08:47) - Sipas KQZ-se vëzhguesit janë përfaqësues te organizmave ndërkombëtare të specializuara në fushën e zgjedhjeve, si dhe nga shoqatat shqiptare të shoqërisë civile, të angazhuara në problematikat e mirëqeverisjes dhe demokratizimit.

(08:30) - Procesi zgjedhor i 28 qershorit do të monitorohet nga afër nga rreth 5500 vëzhgues shqiptarë dhe të huaj. Te dhënat qe u dhanë nga KQZ, flasin për 500 vëzhgues ndërkombëtarë dhe gati 5 mijë të tjerë vendas, të cilët janë shpërndarë në të 12 qarqet e vendit.

(08:15) Vlorë/ Në këtë proces, do të hedhin votën e tyre, 187428 zgjedhës, të shpërndarë në 13 bashkitë dhe komunat e këtij rrethi. Ne Vlore funksionojnë 3 KZAZ, në 3 zona zgjedhore me numër 61, 62 dhe 63, me gjithsej 208 qendra votimi. Në KZAZ nr 61 ku do të numërohen votat e 102403 zgjedhësve, janë 86 qendra votimi. KZAZ nr 62, do të ketë 38381 zgjedhës, të komunave dhe bashkive të zonës së Lumit të Vlorës, dhe janë ngritur 70 qendra votimi. Në KZAZ me numër 63 me 42604 votues të komunës Qendër dhe Novoselës, do të funksionojnë 52 qendra votimi.

(08:05) Vlorë/ Procesi i votimit për zgjedhjet e përgjithshme nisi zyrtarisht në rrethin e Vlorës, në orën 07.00.

(08:00) - Sipas një deklarate te Ministrisë se Brendshme; ''Zyrat e shpërndarjes së letërnjoftimeve elektronike do të jenë të hapura gjatë gjithë ditës së dielë, datë 28 qershor, nga ora 09:00 e mëngjesit deri në orën 19:00 të mbrëmjes.''

Ministria u kërkon qytetarëve që kanë aplikuar, veçanërisht atyre pa pasaportë, që të shfrytëzojnë kohën dhe lehtësitë e krijuara për të tërhequr dokumentin e tyre elektronik.

(07:45) Qe nga viti 1991, kur ne Shqipëri u vendos sistemi pluralist, zgjedhjet parlamentare të 28 Qershorit janë të shtatat që zhvillohen. Gjatë këtyre 18 viteve, 2 herë janë mbajtur zgjedhje të parakohshme, në vitin 1992, ku fitorja i takoi PD-së dhe në vitin 1997, ku fituese u shpall PS.

(07:30) Rreth 5500 efektiva të Policisë së Shtetit janë ne angazhim në gjithë Shqipërinë dhe do të sigurojnë mbarëvajtjen e procesit zgjedhor, i cili filloi sot ne orën 07:00. Vetëm në qarkun e Tiranës, janë ngritur 823 Qendra Votimi, që mbulohen nga Komisariatet e Policisë Nr.1,2,3,4,5,6 dhe Kavajë. Personeli policor i angazhuar me detyra zgjedhore, është i pajisur me dokument identifikimi, që përmban fotografinë, gradën, emrin dhe mbiemrin e punonjësit të policisë, numrin kodik, si dhe Nr. e Qendrës së Votimit apo KZAZ/VNV-se.

(07:25) Koalicioni i djathtë "Aleanca për ndryshim", (Partia Demokratike) ka ne grupin e saj 16 parti. Koalicioni i dytë i djathtë është "Poli i Lirisë", i drejtuar nga ish-kryeministri Aleksandër Meksi, (6 parti), ndersa 2 koalicionet e majta janë: "Bashkimi për Ndryshim" me pesë parti pjesëmarrëse dhe i kryesuar nga PS, dhe "Aleanca Socialiste për Integrim", i përbërë nga 6 parti dhe i drejtuar nga LSI, e ish-kryeministrit Ilir Meta. Ne gare merr pjese Partia "Ligj dhe Drejtësi", e drejtuar nga Spartak Ngjela, e cila konkuron e vetme. Për Qarkun e Tiranës, do të konkurrojë dhe një deputet i pavarur, Abdulla Omuri, përfaqësues i komunitetit të invalidëve.

(07:15) - Në zgjedhjet sotme janë në garë 34 subjekte zgjedhore, 33 prej të cilave janë grupuar në katër koalicione, dy të spektrit të djathtë dhe dy të majtë.Qytetarët shqiptarë do të zgjedhin 140 deputetët e parlamentit të ardhshëm. Zgjedhjet e 28 qershorit janë të parat në Shqipëri që zhvillohen me sistemin e ri proporcional rajonal. Zgjedhjet e 28 qershorit janë të shtatat që zhvillohen në Shqipëri, nga vendosja e sistemit pluralist në vitin 1991. Nga ajo periudhë tre herë fituese janë shpallur forcat e djathta dhe tre herë ato të majta.

(07:00) - Sot me date 28 Qershor 2009, ka nisur zyrtarisht procesi i votimit për zgjedhjet parlamentare 2009, në Republikën e Shqipërisë. Sipas Kodit Zgjedhor, qendrat e votimit mbyllen në orën 19.00. Në të gjithë vendin janë ngritur mbi 4750 qendra votimi.

HermesNews - ©2009

Dërgo me email | Stampo artikullin | Artikulli është lexuar 791 here