6/23/2009 11:33:56 AM

AAK-ja kërkon nga Auditori i Përgjithshëm hetime për shpenzimet buxhetore

AAK-ja i ka dërguar të hënën një letër shefit të Zyrës së Auditorit të Përgjithshëm të Kosovës, Lars Lage Olofson

info@hermesnews.org
23 Qershor 2009

PRISHTINE- AAK-ja i ka dërguar të hënën një letër shefit të Zyrës së Auditorit të Përgjithshëm të Kosovës, Lars Lage Olofson, të cilit i kërkon që të hetojë tërheqjen nga buxheti i Kosovës të 266 milionë eurove, të konvertuara në letra me vlerë. Sipas AAK-së zyrtarët qeveritarë janë të përfshirë në këtë transaksion që është i dëmshëm për qytetarët e vendit.

Aleanca për Ardhmërinë e Kosovës (AAK), duke u bazuar në raportin e shpenzimeve buxhetore për vitin 2008, ka evidentuar shkelje serioze të ligjeve në fuqi dhe të Kushtetutës së Kosovës. Nga buxheti i Kosovës janë tërhequr mbi 266 milion euro (dyqind e gjashtëdhjetë e gjashtë milion) dhe janë konvertuar në letra me vlerë. Interesi i Kosovës nga ky transaksion për afat të panjohur dhe të pacaktuar është i tejet i vogël apo thjesht i neglizhueshëm.

Përpos se shumëfish i paligjshëm, ky veprim i qeverisë është po ashtu tepër i dëmshëm për Kosovën. Ne kemi arsye të besojmë se në këtë transaksion tepër të madh dhe të paqartë për publikun janë të involvuar qarqet më të larta qeveritare. Unë kërkoj nga ju që në bazë të kompetencave dhe obligimeve të cilat ju jep Kushtetuta e Kosovës të bëni hetimet e nevojshme dhe të bëni të mundur që populli i Kosovës ta marrë vesh se si po menaxhohet pasuria e tyre.

Besoj se fillimisht, ashtu si edhe ne, do t’i referoheni raportit të shpenzimeve për vitin 2008, të cilin e ka prodhuar Qeveria e Kosovës”, thuhet në letrën e AAK-së dërguar Auditorit të përgjithshëm i Kosovës Lars Lage Olofsson, Kryeprokurorit të Republikës së Kosovës, Hilmi Zhitia dhe shefit të EULEX-it, Yves de Cermabon, nënshkruar nga Ramush Haradinaj, kryetar i Aleancës për Ardhmërinë e Kosovës.

Sondazh/ Cili duhet të jetë Kryeministri i ri

HermesNews-©2009

Dërgo me email | Stampo artikullin | Artikulli është lexuar 136 here