Video

Nga Albert Zholi

TIRANËNjë vajzë energjike që talentin e saj mundohet ta shfrytëzojë më së miri. Dhe pse tashmë sapo i ka mbushur të 19-at, ajo po paraqitet në skenat shqiptare si një këngëtare profesioniste. “Top - Fest 1”, i hapi rrugën e karrierës dhe ajo tashmë me klipin e saj të fundit pretendon ta kthejë këtë këngë në një hit të të rinjve. Ajo për “Hermesnews” rrëfen impresionet e para të skenës dhe vështirësitë për realizimin e klipeve.

Cila ka qenë kënga e parë që keni kënduar në skenë dhe ku?

Kënga e parë titullohet ''E dua shikimin tënd''. Ishte një bashkëpunim me grupin “Realitet” dhe është kënduar në “Top-Fest 1. Por më parë kam kënduar dhe në disa koncerte që janë zhvilluar në qytetin e Elbasanit. Më pas kam punuar me Gjergj Jorgaqin, ku një nga këngët e tij e vendosa ta bëj klip, i cili titullohet ''Fajtor pa faj'' dhe është transmetuar në televizionin BBF. Kjo ishte nisma më serioze e imja në drejtim të përballjes me shikuesin e shumtë, por edhe me këngëtarët potentë që për çdo ditë me këngët e tyre transmetohen në këtë televizion të specializuar për këngët popullore

Në të vërtetë kur ka nisur rruga juaj e këngës?

Kam kënduar që e vogël në spektakle shkollore gjithashtu dhe në disa qytete të vendit tonë, por në Top-Fest 1 ka qenë hapi më serioz dhe kuptimplotë në ballafaqimin me këngën si profesioniste. Këto janë evenimente ku njeriu tregon aftësitë, cilësitë, apo merr me vete dështimin. Pa një ballafaqim të tillë, këngëtari nuk mund të pretendojë seriozisht në rrugën e skenës.

Çdokush ka një njeri që ja dedikon zbulimin e talentit, kush është ky njeri për Silvian?

Mësuesi i muzikës në shkollën 8-vjeçare. Ai pasi më kishte dëgjuar shumë herë më këshilloi të vazhdoja shkollën e muzikës për kanto, gjithashtu dhe këngëtari tashmë i madh Albert Tafani, që me sa duket më ka përcjellë dhe mua (qesh), pak nga zëri i tij aq melodioz.. Të dy i falënderoj shumë për nxitjen dhe forcën që më dhanë. Pa një nxitje të tillë, nga profesionistë të mirëfilltë dhe mirëdashës këngëtari nuk mund ta gjejë lehtë dhe kur duhet rrugën magjike të skenës. Ai (ajo) pa këtë ndihmë do të vonojë apo do hallakatet në misteret e panumërta të këtij profesioni kaq potent.

A të kanë përkrahur prindërit në rrugën tuaj të skenës?

Patjetër që po dhe i falënderoj sepse kanë qenë gjithmon të gatshëm për të më ndihmuar. Tashmë dihet se prindërit janë ata që ndikojnë drejtpërsëdrejti në këtë rrugë. Pa mbështetjen e tyre të gjithanshme, kënga mbetet veç një ëndërr në sirtar. Prindërit kanë rolin më të madh në jetën skenike të fëmijës së vet. N.q.s prindi do të ketë paragjykime, fëmija ecën mes dyzimit në këtë rrugë, ose e lë në mes.

Cilat këngë janë më të preferuara për ju?

Baladat kanë qenë të preferuarat e mia dhe vazhdojnë të jenë. Por kjo nuk do të thotë se nuk këndoj këngë të tjera, apo nuk dëgjoj të gjitha gjinitë e këngëve . Unë preferoj dhe këngët popullore tipike elbasanase apo ato të Shqipërisë së Jugut.

Cilët pëlqeni nga këngëtarët shqiptarë, po nga ato të huaja?

Shqiptarë, janë shumë...Të huaj Michael Jackson. Më emocionon çdo këngë e tij.

Çfarë është primare për një këngëtare bukuria apo zëri?

Dihet që për çdo këngëtar zëri është më i rëndësishëm, por dhe të kesh një prezencë të bukur në skenë s’është keq.

Sa kohë i kushtoni lukut në ditë?

Shumë kohë i kushtoj dhe lukut, më pëlqen e bukura, por jo e ekzagjeruar.

Veshja e preferuar?

Serioze.

A është e dashuruar Silvia dhe sipas konceptit tuaj, a ekziston dashuria e vërtetë?

Thonë që ekziston,unë personalisht se kam provuar akoma.

Si e ëndërroni princin tuaj të kaltër?

Inteligjent, i respektueshëm por edhe i pashëm.

Ushqimi i preferuar?

S’kam naze në ushqim, të gjitha nga pak i preferoj.

A jeni e lidhur me shtypin dhe me librin dhe çfarë lexoni më shumë?

Lexoj shumë në veçanti librat e Danielle Steel. Veçoj: ''Një jetë e përmbushur'', ''Sa vështirë të besosh'', ''Një herë në jetë''.

Me kë keni punuar për këngët tekstet dhe muzikën?

Siç e thashë dhe më parë me Gjergj Jorgaqin, Stinen dhe “Street dogs”, të cilët i falenderoj për ndihmën që më kanë dhënë.

Duke e krahasuar me klipin e parë ky klip, a përbën një hap përpara në rrugën tuaj?

Sigurisht. Po të mos ishte ndryshe as që do e merrja mundimin që ta promovoja. Besoj se tashmë e ka marrë notën nga publiku. Këngëtarja që kërkon nga vetja gjithmonë në çdo promovim të ri duhet të jetë një shkallë më lart. Regresi apo stanjacioni janë fundi i karrierës së çdo këngëtari.

Paraqitja në skenë

Asnjëherë nuk jam ndjerë keq në skenë sepse publiku më ka pritur gjithmonë mirë. Kjo ka qenë e rëndësishme për mua por e tillë mbetet edhe për çdo këngëtar në fillimet e tij. Siguria e fillimit mbetet çelësi i suksesit. Mund të them se ka qenë pikërisht publiku ai që më ka nxitur në këtë rrugë dhe e shikoj se po të mos ishte ai rruga ime do të ishte tepër e vështirë.

Klipi ''Kur ka lekë''
Klipi i sapo promovuar është klipi im i dytë pasi lart fola dhe për klipin e parë.

Ky klip titullohet ''Kur ka lekë''. Pra ka një fabul interesante. Një fabul jetësore që është shumë prezente në realitetin shqiptar. Pra flet për vajzat materialiste që para parasë humbin shumë në gjykim. Dhe ky materializëm humb shumë nga personaliteti i femrave dhe i bën ato shumë dembele. Një klip që më mori shumë kohë, sepse dhe vendet e xhirimit duhet të ishin specifike.

Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi.

Dërgo me email |

Stampo artikullin |

Artikulli është lexuar 325 here